3 ka lalaki gintiro sa Tigbauan

Ni Ime Sornito

Monday, March 20, 2017

Syudad sang ILOILO – Ospital ang gindangatan sang tatlo ka mga lalaki matapos nga ginpangtiro sa Barangay Nagba, Tigbauan, Iloilo.

Gindala sa Guimbal District Hospital sanday Mark Anthony Villanueva y Habit, 32, kasado, nga may pilas sa wala nga dulonggan; Marlon Terre y Ticot, 47, kagawad, nga may pilas sa  tuo nga dulonggan; kag Rolando Trasadas y Canete, 42, kasado, nga nakaagom sang pilas sa likod nga bahin sang ulo.

Sandig sa report sang Tigbauan Police Station, mga alas-10 sang nagligad nga Biyernes sang gab-i sang natabo ang krimen. Nagapungko sa gwa sang tiangge ang tatlo ka mga biktima kag naga-istorya sang hinali nga naglabay ang suspek nga si Albert Gardose, legal ang edad kag residente sang Brgy. Binaluian Minor, Tigbauan, kag basta na lamang sini nga ginpangtiro ang mga biktima gamit ang caliber .38 nga revolver.

Sunod sini, madasig nga nagdalagan para magpalagyo ang suspek samtang ang mga biktima ginbuloligan dala sa ospital sang ila mga himata.

 

Daan naman nga hiligut-anon ang ginatudlo sang kapulisan nga motibo sang krimen./PB