ASAWA GINTIRO SANG BANA

Ni Ime Sornito

Monday, March 20, 2017

Syudad sang ILOILO – Napilasan sa dughan ang asawa matapos nga gintiro sang iya bana sa Barangay Pawa, Nabas, Aklan sang Sabado sang kaagahon.

Ginabulong pa subong sa St. Gabriel Hospital sa Kalibo, Aklan si Jackilyn Francisco y Mahan, 24.

Nakilala naman ang suspek nga si Ronnel Francisco y Empos, 30, kag residente sang Brgy. Pawan, Nabas, nga nadakpan man dayon sang kapulisan.

Base sa imbestigasyon sang Nabas Police Station, nagbaisay ang mag-asawa sa sulod sang ila balay bahin sa ila bata sang hinali lamang naglanog ang tatlo ka asud-asod nga matunog nga mga lupok.

Sang ginsekyar sang ila mga himata, nakita na lang ang asawa nga duguon kag wala na sang animo.

Ginhingagaw dala sa ospital si Jackilyn samtang gin-aresto naman sang nagresponder nga mga pulis ang iya bana.

Sa dugang nga pagpangusisa sang Nabas Police Station, nag-ugat ang insidente sa pagbaisay sang mag-asawa bahin sa ila bata nga babae./PB