Australian nat’l ginbunu-patay sa Himamaylan

Ni Cyrus M. Garde

INSERT DATE HERE!

Syudad sang BACOLOD – Patay ang Australian national sang ginbunu sang iya trabahador sa Puro Iglawod sa Barangay To-oy, Syudad sang Himamaylan, Negros Occidental sang Sabado sang udto.

Ginkilala ni Senior Inspetor Raymndo Franco, deputy chief sang Himamaylan City PNP, ang biktima nga si Warren Hill, legal ang edad kag naga-istar sa amo nga duog.

May pilas sang pagbunu ang biktima sa iya lawas kag gindala sa Gov. Valeriano M. Gatuslao Memorial District Hospital sa amo nga syudad apang ginlawag nga patay pag-abot didto.

Gilayon naman nalagyo ang suspek nga si Robert Flores, 20, kag naga-istar sa isa ka nabukid nga barangay sang Syudad sang Himamaylan.

Sunu sa inisyal nga imbestigasyon sang kapulisan, hana na nga magtulog ang suspek sadto nga udto sang ginpalapitan sang biktima kag ginhura-hura kay may isugo kontani kag wala pa sini matapos ang iya obra.

Upod man sang suspek ang isa ka timbang nga babae sang ginkompronta sang biktima. Sa kainit, nagkuha ang suspek sang patalom nga gingamit sa pagbunu sa biktima.

Sunu pa kay Franco, may mga alegasyon nga ginpahog pa sang biktima ang suspek nga pahalinon sa obra kag mahimu amo yadto ang rason nga naakig ang naulihi.

 

Ginpangabay naman sang mga pulis ang mga Army nga nadestino sa amo nga syudad nga buligan sila dakop sa suspek./PB