BABAE GINLASAK SANG TRAK

Ni Ime Sornito

Friday, April 21, 2017

 

Syudad sang ILOILO – Ginbawian gid sang kabuhi ang babae nga nalasakan sang trak sa Barangay Tuble, San Dionisio, Iloilo alas-tres sang hapon kahapon.

Patal nga pilas sa ulo kag madamo pa nga mga pilas sa iban nga bahin sang lawas ang naangkon sang biktima nga si Ma. Elena Chaves, kasado kag residente sang Brgy. Silagon, Ajuy, Iloilo, rason nga ginbawian dayon sang kabuhi.

Maswerte naman nga minor nga mga samad lang sa lawas ang naagom sang iya bana nga si Robert nga gindala sa Sara District Hospital.

Sandig sa inisyal nga report sang San Dionisio PNP, nagasakay ang mag-asawa sa motorsiklo nga ginamaneho sang bana para magpauli sa ila balay sang nagluntad ang aksidente.

Gina-alegar nga naga-usoy sang direksyon padulong sa Ajuy ang mag-asawa kag ang trak nga ginamaneho ni Ronnie Ballon, 40, sang Pilar, Capiz, sang gulpiyada nga nag-overtake si Robert pero aksidente nga nakasasa-id ini sa trak.

Nahulog naman gikan sa motorsiklo si Ma. Elena kag nalab-ot gid sang trak nga madasig man ang pagdalagan.

Nagsungka man gilayon ang drayber sang trak sa San Dionisio PNP kag natalana kasohan sang reckless imprudence resulting to homicide./PB