BABAE PATAY SA LOVE TRIANGLE

Ni Cyrus M. Garde

Tuesday, March 21, 2017

Sudad sang BACOLOD – Patay ang babae samtang napilasan naman ang lalaki nga iya ginapuyo sang aksidente nga natirohan mga alas-11 sang gab-i sang Domingo sa Puro Medalla Milagrosa, Barangay Sum-ag diri.

Nakilala ang napatay kay Maricar Marañon, 27, kag tumandok sang Sitio Punta Aplaya, Brgy. Poblacion, Syudad sang Bago, Negros Occidental.

May tatlo ka igu sang pagtiro ang biktima sa iya liog, ulo kag idalom sang suso, sunu sa inisyal nga imbestigasyon sang Police Station 9. 

Ang napilasan naman nga ka-relasyon ni Marañon amo si Melchor Flores, 48, kag nagapuyo sa Purok Medalla Milagosa, Brgy. Sum-ag, samtang ang suspek naman ginkilala kay Jose Rommel Jolito, 43, sang Brgy. Pacol, Syudad sang Bago nga anay ka-live-in ni Marañon.

Sunu sa mga pulis, nagsakay sa traysikol si Jolito padulong sa ginarentahan sang mag-live-in partner nga Marañon kag Flores. 

Nagakatulog na ang duha sang puersa nga ginsipa sang suspek ang ganhaan kag nagsulod. Nakibot ang duha kag sang nagbangon si Flores, ginlamposan sia ni Jolito sang pulo sang iya pusil.

Nagdumogay ang duha ka lalaki sa armas kon sa diin aksidente nga napitik ini nga sang naglupok nag-igu kay Flores pero ang napurohan amo si Marañon.

Gilayon man nga nalagyo si Jolito nga may isa pa ka upod nga wala nakilala. 

Sunu pa sa Police Station 9, mahimu pasakaan sang kaso nga murder kag frustrated murder ang suspek lakip na ang iya kaupod./PB