Buffer stock sang NFA-Iloilo bastante

Ni Ime Sornito

Friday, April 21, 2017

 

Syudad sang ILOILO – Ginpasiguro sang National Food Authority (NFA)-Iloilo nga bastante ang ila buffer stock para subong nga tag-ilinit.

Hambal ni Director Erna Abello sang NFA-Iloilo nga magalawig sang 124 ka adlaw ukon apat ka bulan ang buffer stock nila sang bugas para sa mga pumoluyo sang probinsya sang Iloilo.

Ang mga bugas lunsay nakatago sa bodega sang NFA-Iloilo kag indi dali-dali nga maglaw-ay bisan pa maligaran sang malawig nga mga binulan.

Gindugang ni Abello nga bisan diutay na lang nga mga mangungoma ang nagatanom sang palay bangod sang panahon sang tag-ilinit, estable gihapon ang presyo sang bugas sa probinsya. Nagapabilin sa P17 ang presyo sang well-milled rice ukon ang government support price nga ginabakal sang NFA sa mga mangungoma

Gani nga wala dapat sang kahangaw-an ang mga pumoluyo sang probinsya kon maglawig man ang panahon sang tag-ilinit kag indi makatanom sang palay ang mga mangungoma.

Sa nahibaluan nga kon hambalan ang produksyon sang palay, ang probinsya sang Iloilo makabig nga may surplus ukon may sobra nga suplay rason nga nagapadala pa sa iban nga mga probinsya kaangay sang Negros kag Cebu./PB