Drayber gintiro-patay

Ni Cyrus M. Garde

Tuesday, March 21, 2017

Syudad sang BACOLOD – Patay ang drayber sang gintiro sang isa sa duha ka suspek sa circumferential road sa Purok Kamansi, Barangay Banago diri alas-10:30 sang aga sang Domingo.

Ginkilala ni Senior Inspector Larry Teovisio, hepe sang Police Station 3, ang biktima nga si Efraim Payas, 43, kag naga-istar sa Purok Tinagong Paraiso, Brgy. Banago. May mga pilas sia sa ulo kag lawas nga gintunaan sang iya kamatayon.

Sunu sa imbestigasyon sang pulis, nagakaayo sang iya salakyan si Payas sa may vulcanizing shop sa amo nga lugar sang may salakyan nga nagasunod sa iya nga nagdulog.

Pagkakita sang biktima nga sia ang tuyo sang duha, nagpulot sia sang bato kag ginhaboy ang duha.  

Gilayon naman nga nanaog ang isa sa duha ka suspek kag gintiro si Payas.

Dugang pa sang pulis nga dumot ang kabangdanan sang insidente kag may yara na sila person of interest apang indi pa nila mabuyagyag./PB