Gwardiya na-aksidente sa motor, patay

Ni Cyrus M. Garde

Thursday, April 20, 2017

 

Syudad sang BACOLOD – Ginbawian sang kabuhi ang gwardiya matapos nga nakabunggo ang iya motorsiklo sa pader sang isa ka balay sa Osmeña Avenue sakop sang Brgy. 6, Syudad sang Victorias, Negros Occidental alas-tres sa kaagahon sang Martes.

Ginkilala ni Supt. Herman Garbosa, hepe sang Victorias City PNP, ang biktima nga si Dominic Embo, 39, kag tumandok sang Brgy. Caduhaan, Syudad sang Cadiz. Nakaagom ini sia sang madamo nga mga pilas sa diin ang patal yara sa iya ulo.

Ginhingagaw pa sia dala sa Ikaayong Lawas Foundation Medical Clinic sa amo nga syudad apang ginliton sa Teresita Jalandoni Memorial Provincial Hospital sa Syudad sang Silay kag sang ulihi ginliton pa gid sa Corazon Locsin Montelibano Memorial Regional Hospital apang mga alas-cuatro y medya sa hapon ginbawian ini sang iya kabuhi.

Si Embo, gwardiya sa isa ka bulolngan sa Syudad sang Bacolod, nagapakadto na sa Syudad sang Bacolod sadtong Martes sang kaagahon sang na-aksidente.

Sunu sa imbestigasyon, madasig ang padalagan sang biktima sa iya motor kag wala niya natalupangdan ang early warning device nga ang dalan ginakaayo. Nakabunggo ini sa pader sang isa ka balay kag nagtabog.

Sa pihak nga bahin, sang nagligad nga Lunes sang gab-i, isa man ka gwardiya nga sakay sa motorsiklo ang nalapakan sang cargo truck sa Airport Road sa Hacienda Panawgaw sa Brgy. 4 sa Syudad sang Silay.

Mapadulong na kontani ang biktima sa iya duty sang natabo ang aksidente sang nagbahar sia bangod na-alang-alang sa ginaobra nga dalan sang tuyo sini maglusot sa ginasundan nga cargo truck nga may karga nga tubo padulong sa Central Hawaiian.

Ang iya manibela nagsag-id sa kilid sang trak kag natumba kag nalapakan sang pangulihi nga goma sang trak.

Nagsungka naman sa pulis ang drayber nga si Aljohn Gregorio, 27,  sang Brgy. Baagtik, Syudad sang Silay./PB