PAUTWAS!

BY JOEL FRANCO

Thursday, October 12, 2017

SA DIIN na bala ang mga kaalyado subong ni Mayor Jed Patrick Mabilog?

Sa malawig na nga tinion nga gintampalas ni President Rodrigo Duterte ang ngalan sang syudad sang Iloilo kag alkalde, wala gid sang may nagdepensa sa iya. Matuod indi ko man kilala ang pagkatawo ni Mabilog apang ang patarasak nga paglasak sang iya pagkatawo sa panan-awon sang publiko sobra-sobra naman.

Sa pihak sini nahangpan man naton ang Presidente. Siguro ginaduso lang sia sang iya tampad nga handum nga matinluan sang ilegal nga droga ang pungsod gani nagagamit na sia sang mga extrajudicial nga pamaagi agud malagas ang iya ginapatihan nga may koneksyon diri.

Pero indi ta man mapahigad nga may politika man ini kay diri sa Iloilo lampaso gid si Duterte kag may mga higayun pa nga wala sia ka kampanya sa mga barangay sa syudad bangud wala sang kuryente.

Kun ano man ang motibo nya sa iya padayun nga pagtampalas sang ngalan sang Iloilo sia na lang ang nakahibalo. Presidente sia, may mga bagay sia nga nahibaluan nga wala naton nahibaluan.

Pero sa mga paglasak-lasak sang President sa imahen sang Iloilo kag sa amay sang syudad nga si Mayor Jed Patrick Mabilog, sa diin na ang kaalyado sang alkalde? Ngaa wala gid sila makapahayag sang ila pagpangapin bisan indi na kay Mabilog, para na lang sa syudad sang Iloilo?

Malinong ang mga kaupod sa politika sang alkalde. Pinakalinong sa ila si Cong. Jerry Treñas. Kun pamangkuton sang media masabat lang, pamangkota si mayor kun ano nabulig ko sa iya. Maathag nga nahadlok sia manindugan para sa syudad.

Kun ikaw ang tiglawas sang mga Ilonggo kag ginatampalas na ang ila kadungganan, wala ka bala nagabatyag sang kasakit sang buot? Teh, ngaa naghipos lang si Treñas? Asta subong wala sia sang ginhimo sa Kongreso agud dampigan ang ngalan sang Iloilo nga gintawag ni Duterte nga “most shabulized” kag “bedrock of illegal drugs.”

Kun si Vice Mayor Jose Espinosa naman ang pahambalon, wala sang tinaga nga nagakawas sa iya baba. Ni makaisa wala gid nakabuhi sang tinaga agud depensahan ang syudad nga iya gin alagaran sang masobra duh aka dekada.

Sa diin na bala sila?

Ang mga konsehal sang syudad mas labi nga mahipos. Ay nano?

Maduha na kabulan nga wala sa syudad si Mabilog. Mabatyagan na ang iya absence sang mga Ilonggo. Karon nga naglinong na gawa ang isyu, sigurado madamo naman ang magapapel. Masubo lang nga sang una madamo ang upod ni Mabilog sa lamesa sa pagkaon, apang subong nagaisahanon na lang sia kag wala sang may nagasuporta.

Sa simple nga pulong, gintalikdan sia sa ti-on sang piga-piga pero kun bugana na, ara naman sila! (jpranco1975@gmail.com/PN)