PANUGDAON | NAGAPALUTAW APANG NAGALANTAW

Ni ROBERTO ‘BERT’ LADERA

Friday, April 21, 2017

 

 

Manami lantawon ang pagpa-utaw-utaw sang bag-o nga sakayan sang Philippine Coast Guard (PCG) sa baybayon sang Iloilo. Ginatawag ini nga BRP MALABRIGO (MRRV-4402) nga ikaduha nga multi-role response vessel sang PCG nga ginbakal sang gobyerno sang Pilipinas sa Japan paagi sa 7.373 billion loan agreement nga ginsulod kaupod sa Japan International Cooperation Agency ukon JICA sang tuig 2013.

Nagdungka ini sadtong Abril 19 sa San Pedro Port sa Syudad sang Iloilo kag ginbuksan sa publiko agud nga ila malantaw kag sila ang makasaka sa sakayan kag ma-eksperyensyahan kon ano ang balatyagon nga yara sa ibabaw sang sini nga sakayan.

Naglibot man ini sa iban nga bahin sang Panay kag nagresponder sa pila ka mga insidente kaangay sang pagkalumos.

Ginapakita lamang sang gobyerno sa mga pumuluyo nga may ikasangkol kita nga mag-amlig sa aton baybayon, sa aton nasakpan nga teritoryo kag sa pagdampig sang aton soberanya.

Ginasiling man nga nagpadulong sila diri agud nga magbisita kag magpakita sang ila presensya sa mga pumuluyo sang Western Visayas.

Maayo ang ila katuyuan nga ginkakunyagan gid sang kadamuan kag madamo ang naglantaw kag nagsaka sa ibabaw sang sakayan kag nagbatyag sang tuhay nga kalipay kag bugal bilang Filipino.

Sa pihak sini nga mga pahayag sang katuyuan, akon ginalantaw nga may tuhay pa gid sila nga intensyon sa pagpadulong diri sa isla sang Panay kag sa mga katupad nga isla nga yara sa aton luyo.

Nagapati ako nga nagapamatyag sila sa kon may mga tuhay nga grupo sang tawo nga magtuyo nga maghalit sa Syudad sang Iloilo kag sa isla sang Boracay bangud nga ginasiling sang militar nga soft target sang Abu Sayyaf Group ang nahinambitan ko nga mga lugar.

Kahibalo kita nga may nagluntad nga engkwentro sa tunga sang militar kag kapulisan batok sa Abu Sayyaf Group sa Bohol. Nabantala nga may yara sang mga napatay kag may yara sang nagapabilin nga buhi.

Ginalauman nga kon indi matikma ang iban pa nga katapo sang Abu Sayyaf Group, mahimo nga magatipon sila sang ila pwersa kag liwat nga magatuga sang kalakasan.

Daku ang aton pagpasalamat bangud wala sang may natabu nga kalakasan sa tion sang pag-obserbar sang Semana Santa kag nangin malinong kag matawhay ang tanan kag naglipas ini nga wala sang my nahalitan.

Nagapati ako nga sa pihak sang paghangaw-hangaw sang BRP MALABRIGO sa aton baybayon, ulayhon diri ang ila pagbantay sa presensya sang mga samong.

Luyag lamang nila nga ipasiguro nga indi sila malutsan sang nasambit nga grupo kag makatuga sang kalakasan, nagayuhum ang mga otoridad sa pag-amuma sa mga nakunyag apang naga-aligmat sa mga may malain nga handom.

Handa sila nga maglayag, magpanglaot sa kalalawran kon may yara sang mga samong nga magatuga sang kahalitan kag magatublag sa kalinong kag katawhay.

Ang ila presensya sa lawod nakahatag sang seguridad nga wala sang samong gikan sa kadagatan nga magatuga sang huol sa mga yara sa pangpang kag honasan.

Naagom naton ang kalinong kag katawhay samtang ang BRP MALABRIGO ang nagapalutaw apang nagalantaw./PB