[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’Panugdaon ni Matt ‘ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni Wenceslao “Matt” E Mateo Jr.
[/av_heading]
[av_textblock size=” font_color=” color=”]
Indi solusyon ang padayon nga
pagpamatay sang mga durugista
LAMHARON pa kaayo, Grade 11 kag 17 anyos lang si Kian delos Santos sang Caloocan City. Handom niya kuntani ang mangin pulis, sunu sa iya ginikanan, apang ang mga pulis nga idol niya mismo ang nagkutol sang iya matahum nga handom.
Si Kian napatay sang mga pulis sadtong Agosto 16 samtang nagapatigayon sila sang “drug raid” sa idalom sang “Operation Galugad” nga kabahin sang “One Time, Big Time” nga operasyon sa bug-os nga pungsod.
Sunu sa mga pulis, armado si Kian sang luthang kag nagpalupok amo gani nga naluthangan siya patay, katulad sang natabo sa madamo pa nga iban.
Apang ang apat ka testigo nanindugan nga si Kian wala sing armas kag yara na sa kustodiya sang mga pulis pagkatapos mag-surrender. Ang isa ka CCTV footage sa lugar nagpakita gani nga ginaguyod na siya palayo sang masapwan sang ulihi nga patay na nga nagabarikutot sa isa ka higad.
Nagsiling ang mga pulis ugaling nga sala ang mga eksena nga nakita sa CCTV kay patay na si Kian sang guyuron palayo.
Apang sin-o gid ang nagasugid sang matuod? Ang mga pulis ukon ang apat ka testigo?
Ang publiko nagaduha-duha na nga nagasugid sing matuod ang mga pulis sa madamo na nga kaso, lakip ang kaso ni Kian. Ang isa ka pulis gani nag-aku nga kon kis-a gina-plantedan nila ebidensya (droga kag luthang) ang mga suspek agud madakop kag basta tiruhon na lang agud indi na kalab-ut ang ila kaso sa korte, sa diin sa madamo nga okasyon naka-libre sila.
Matuod, “unfair” ini nga pagpati kontra sa pulis sa kabilugan, apang sin-o ang makasiling nga sa tanan nga pinatyanay nga ini ginasunod gid pirme sang mga pulis ang kasuguan? Labi na gid kay mabudlay man patihan sang iban nga sa tatlo ka adlaw lang, sang sini lang, mga 58 gid ang napatay tungod nagbato sa mga pulis.
Importante ang kredibilidad sang mga pulis sa sini nga dinakpanay sa droga nga masami may pinatyanay. Kon wala na ini (ang kredibilidad) tungod indi na mapatihan ang mga pulis sa sining pinatyanay, sa lugar nga ginataha pa naton sila, mangin kalahadlukan na ini sila bisan sang mga inosente nga mga pumuluyo.
Ang trigger-happy nga pulis natural indi masaligan sang bisan sin-o man. Kag madamo sing ebidensya sina ang publiko.
-0-0-0-
Kon nagapati ang mga pulis nga ang padayon nga pagpatay sa mga durugista ma-untat na ang bisyo sa droga, daku nga sala ini nga panghuna-huna.
Ang eksperyensya sang Mexico nagapakita nga ang pagtapas sang mga sanga indi ina makapatay sang kahoy. Kinahanglan tapson mo gid ang iya ugat para mapatay, sa aton gani pagpati.
Nanotarn ugaling sa Mexico nga indi matapat patay ang kahoy kon tapson mo lang ang ugat. Man isa ini ka ugat nga mientras may nabilin pa nga bahin sa duta matuhaw gihapon kon mabunyagan. Ang problema pa gid amo nga ining kahoy, katulad sang bayabas, sa ugat sini nagabata pa sang dugang nga mga kahoy.
Ini natabo sang ginpanglagas ang mga drug lords. Nagbinulag sila apang nagtuhaw, halin sa ila mismo, ang dugang pa gid nga mga druglords. Iban sa ila gani nagsaylo sang krimen, katulad sang pang-kidnap, carnap, illegal nga pasugal kag iban pa nga krimen agud lang maka-kwarta nga nagpalala pa sang problema sa kalinong.
Sa malip-ut, ang pagpatay sang mga sanga indi makapatay sa kahoy. Indi man gani mapatay ang kahoy kon basta tapson mo lang ang ugat; kinahanglan pamalhan gid sang inug-bunyag para lubos mapatay sa kauhaw.
Sa aton pa, ang mayor nga solusyon amo gid ang pagkutol sang “supply” kay ang “demand” sang droga wala katapusan. Indi kay patyon lang ang mga durugista sing wala kabilinggan, kundi dakpon lang kon mahimo kay madamo sa ila sina ang segurado mapadakop lang.
Samtang, ang nagabisyo pa buligan nga magbag-o paagi sa rehabilitasyon kag pagkilala sang kalainan sang ila bisyo para maglikaw na. Kag ang wala pa ga-bisyo padayon nga ginatudluan sang kalainan sang droga agud mapalayo sila diri.
Sa sini nga paagi, kon indi man mapa-untat sing lubos ang pagbisyo sa droga, ma-kontrolar ini kag malimithan sa mga “harmless” nga recreational kag medicinal drugs./PB
[/av_textblock]
[/av_one_full]
