Panugdaon ni Matt | Ngaa indi magpa-drug test si Konsehal Gerochi?

Ni Wenceslao “Matt” E. Mateo Jr.

Thursday, April 20, 2017

 

 

WELL-meaning ang pangabay ni Konsehal Plaridel Nava nga kon puede lang nga tanan sila sa konseho magpa-drug test. Kag indi lang paagi sa urinalysis, ukon pag-eksamin sang ihi, kundi sa pagsiyasat gid sang blood sample.

Base man sa pamatuod sang mga eksperto, ang blood test amo gid ang pinaka-accurate sa paghibalo kon naka-drugs ang isa ka tawo sangsa paagi lang sa ihi (urine) ukon dupla (saliva).

Wala lang kita kabalo kon may ginatumod gid man ang konsehal sang Lapuz nga kaupod sa konseho nga naga-drugs, amo gani nga ginhimo niya ining iya pangabay.

Kon may ginatumod man siya ukon wala, no importa sa aton, basta kita ya kumpormi sining pangabay ni Nava.

Upod kita sa panghuna-huna ni Nava nga kon matuod-tuod gid ang mga konsehal sa ila pag-upod sa away batok sa droga ni Presidente Duterte, kinahanglan una sila sa pagpamatuod nga wala sila naga-entra sa sini nga malaut nga bisyo. Kag mapamatud-an lang nila ini kon sila magpa-drug test.

Pero natingala kita kon ngaa namat-ud, sa isa ka interbyu sa radyo, si Konsehal RLeone Gerochi nga indi gid siya magpa-drug test.

“Wala ako ya ga-drugs, ti ngaa pa ako magpa-drug test?” paathag niya.

“Wala man sing mataas pa sa akon nga nag-order nga magpa-drug test ako. Isa pa, wala man ini pilitay,” dugang pa niya.

“Tungod naglumpat sa bubon ang iban, malumpat ka man,” siling pa gani niya.

Pero, amo lang bala ina ang rason ni Gerochi? Ang iban may suspetso nga ang desisyon ni Gerochi bunga sang indi maayo nga pagtamdanay nila ni Nava tungod sa pila ka indi pag-intiendihanay sa mga nagliligad nga isyu sa konseho.

Kon matuod, ti, iya na iya sentimiento ni Gerochi. Indi gid man naton siya mapilit kay kinamatarong gid man niya tuod nga indi magpa-drug test kon indi siya. Abogado siya kag nabal-an niya ina.

Seguro kon may mataas pa kay Gerochi sa city legislative branch sang gobyerno nga maka-obligar sa iya sa pagpa-drug test, amo gid lang si Vice Mayor Jose Espinosa III.

Ugaling kon tungod lang sa pagpungko nila sa konseho, wala matuod sing poder si Vice Mayor agud piliton siya sa pagpa-drug test.

Sunu sa Supreme Court (SC), sa isa sini ka desisyon sadtong Nobyembre 3, 2008, unconstitutional ang pag-requirer sa isa ka elective official sa pagpa-drug test kay indi kaupod ini sa qualification sang isa ka kandidato.

Gina-dumilian sang Constitution, siling sang SC, ang Mandatory Drug Test sa ila, ukon sin-o man nga opisyales kag empleyado sang gobyerno, lakip na ang mga estudyante sa ila pagpa-enrol sa eskuwelahan sa madamo nga rason, katulad sang kinamatarong sa “privacy”, kag “guarantee against unreasonable search and seizure.”

Ang ginatugutan lang amo ang “mandatory but random” drug test, ukon ang pagpa-drug test sang pila lang ka bilug nga wala sang pinilian. Kag kon may ara man ginatugutan, tungod gid lang ini sa sensitibo nga rason nga kinahanglan gid ipatuman, katulad sa mga atleta agud mabal-an kon naka-drugs samtang gapasakop sa wala dinayaay nga hinampang.

Tungod sini, pila na gani ka mga Olympic players angs na-disqualify. Ang iban nakuhaan pa sang medalya sang madiskubre nga sila naka-drugs. Ang mga insurance companies mapahanugutan man nga ipa-drug test ang ila kliyente tungod naka-cover sila sang benepisyo kon ma-aksidente.

Sa lubos nga kabulusgan sang aton mga bumalasa nga indi abogado, lakip sining kolumnista, gina-refer ta kamo sa Supreme Court En Banc November 3, 2008 ruling on G.R. No. 157870: Social Justice Society, petitioner, versus Dangerous Drugs Board and PDEA, Respondents;

GR No. 158633: Atty. Manuel J. Laserna, Jr., Petitioner, versus Dangerous Drugs Board and PDEA, Respondents; and G.R. No. 161658: Aquilino Q. Pimentel, Jr., Petitioner, versus Commission on Elections./PB