[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]
[av_heading heading=’ Panugdaon ni Matt | Tani mabuligan ang Guimaras sang husto sa iya turismo’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni Wenceslao “Matt” Mateo Jr.
[/av_heading]
[av_textblock size=” font_color=” color=”]
Saturday, June 24, 2017
[/av_textblock]
[av_textblock size=” font_color=” color=”]
NATANDAAN ko pa nga sang gobernador kag kongresista si Emily Lopez sang Guimaras, pagkatapos nga nangin full-fledged ini nga probinsya sadtong Mayo 22, 1992, isa sang mga ginadamgo niya nga programa amo ang himuon nga retirement destination ining matahum nga island-province.
Ugaling sang wala na si Lopez nga sunod-sunod nga ginbuslan sang mag-utod nga Dr. JC Rahman kag Dr. Felipe Nava daw nalipatan na ang ining programa.
Ara sa Guimaras ang halos tanan nga rason agud matuman ini nga handom. Kon magsanyog ining programa, makaganyat ini sang dolyar halin sa mga maga-retire nga mga pangayaw nga makabulig patin-ad sang pangabuhi sing iya mga pumuluyo nga wala pa sang 200,000.
Ini nga programa sadto ni Inday Emily kabahin sing iya handom nga maganyat ang mga pangayaw sa isla paagi sa pagpasanyog sang mga tourist spot kag destinasyon nga makapukaw sang kaluyag sang mga bisita sa matahum sini nga beach, mga lungib, mga kabukiran sa diin masadya nga nagakinanta ang mga nagakalain-lain nga mga pispis, masinaw nga mga falls kag baybayon, ang madamo nga aktibidades katulad sang mountain biking kag ang bantog sini nga Mango Festival, nga si Lopez gid ang nagpasugod kag nagpasanyog.
Daw wala ugaling ining katahum sang Guimaras matalupangdan sang maayo sing aton panguluhan nasyonal, nga nagapasulabi gid lang sing iya pagtamod sa isla sang Boracay.
In fact, kon may madangatan ang mga programa sa turismo sa iban nga lugar sa rehiyon, masami ginahimo lang sang kada probinsya sa ila kaugalingon nga pagpanikasug.
Sanglit ang Guimaras ang pinakadiutay nga probinsya kag indi pa makapabugal sing iya ikasangkol, medyo wigit gid ini sa bisan sa bulig sang panguluhan nasyonal.
Sa nahibal-an naton, indi maayo nga magtutok lang kita sa isa ka lugar (Boracay) agud ibaligya ang turismo sa Kabisay-an Nakatungdan (Western Visayas). Kon matabo ini, ma-isolate ang iban nga lugar, labi na gid ang mga lugar nga may ila man nga kinaugali agud mag-ganyat sang turista kag ang Guimaras isa lang sini.
Isa pa, kanugon lang sang Iloilo bilang “Gateway to Western Visayas” kon wala man lang ini sang kapuslanon para sa iban nga mga lugar sa rehiyon.
Sa matuod, puede ta himuon ang Guimaras bilang sal-i sa mga lugar nga may halos kapareho nga sitwasyon, katulad sang Hawaii.
Madamo sang mga turista nga indi gid man daku ang ila budget. Ang iban sini yara lang sa economy budget, nga puede magsayo sa mas barato nga pagginawi sa Guimaras kag mag-retire na diri.
Diri masulod ang subong nagadaku nga plano sang mga retirado nga mga empleyado sa iban nga lugar nga handom mag-retire sa lugar nga kaya sang ila bulsa tungod sa mataas nga balor sang ila kwarta, sa diin maganyat man sila sa pagpangabuhi sang malinong kag masadya.
Ang Guimaras, bisan si sin-o pa ang pamangkuton mo sa nakabisita diri, isa ka matahum nga lugar, malinong, may may mga mapinalanggaon nga mga pumuluyo, may madamo nga makalilingaw nga aktibidades, kag subong man sang mga facilidades nga kon wala diri yara lang sa malapit nga siyudad sang Iloilo.
Sa sina nga bagay, kinahanglan na lang sang Guimaras ang matuod-tuod nga suporta sang gobyerno nasyonal diri. Tani madugangan pa sang gobyerno nasyonal ang iya bulig sa turismo sining isla./PB
[/av_textblock]
[/av_one_full]
