PANUGDAON | PAGPANGLAKATON

[av_one_full first min_height=” vertical_alignment=” space=” custom_margin=” margin=’0px’ padding=’0px’ border=” border_color=” radius=’0px’ background_color=” src=” background_position=’top left’ background_repeat=’no-repeat’ animation=”]

[av_heading heading=’PANUGDAON | PAGPANGLAKATON’ tag=’h3′ style=’blockquote modern-quote’ size=” subheading_active=’subheading_below’ subheading_size=’15’ padding=’10’ color=” custom_font=”]
Ni ROBERTO ‘BERT’ LADERA
[/av_heading]

[av_textblock size=” font_color=’custom’ color=”]
Monday, April 17, 2017
[/av_textblock]

[av_textblock size=” font_color=” color=”]

Nagabalik kita sa kinaandan nga pagsinarayo sa aton kabuhi. Liwat kita nga magahimakas agud nga makaganar para sa aton matag-adlaw nga kinahanglanon. Liwat kita nga magasulod sa sitwasyon nga aton ginbayaan sang makadali paagi sa pagbakasyon.

Madamo sa aton ang halos daw indi pa magbiya sa pagbakasyon, bangud sa kasadya nga nadulot sini, bangud sa pag-ululupod sang mga abyan kag mga pamilya, bangud sa pag-agom sang pinasahi nga tinion nga makahinun-anon, bangud sa pagpanumbalik sang hugot nga relasyon nga naghalog sa malawig nga tion tuga sang kasakuon sa pagpangita sang palangabuhian.

Malawig ang tinion nga aton naagom sa pagpahunay-hunay bangud sa Semana Santa. Malawig nga tinion man ang aton ginhinguyang sa pagpadulong sa mga lugar nga luyag naton makadtuan, luyag naton ma-eksperyensyahan, kag bangud luyag naton nga maagom ang pinasahi nga lalantawon kag pag-agom sang kalinong sa luyo sang lugar nga malayo sa sibilisasyon kag masaku nga syudad.

Ang aton nga pagpanglakaton kaupod sa aton mga abyan ukon pinalangga sa kabuhi padulong sa mga lugar, nga malaka makadtuan kag hulungdon bangud kinahanglan ang bastante nga tion, ang nagapahanduraw sa aton nga may mga bagay nga mas makahatag sang kalipay sa aton labaw sa mga materyal nga bagay nga aton masami nga ginahandom.

Sa tagsa naton ka tikang makabugtaw kita sa reyalidad nga ang pag-usoy sa banas sang kabuhi nagakinahanglan sang ubay kag kaugalingon nga paghimakas agud nga makalab-ot sa padulungan. Ang pag-usoy sa banas nga masiot, mainit, takladon kag dulhugon ang simbolo sang kabuhi nga puno sang pagpanghangkat. Bisan nagatulo na ang balhas, makapoy, kag daw ginalagas na ang pagginhawa apang nagapadayon sa gihapon sa pag-usoy sa banas.

Komporme na kita sa gamay nga bagay nga aton mabitbit, husto lang sa aton nga kinahanglanon, kag ginapasibu na lang sa kutob sa aton pagkinahanglan. Wala na kita nagademanda pa sang mas damo kag labaw sa kinahanglanon kag nagapangita pa sang komportable nga sitwasyon.

Sa pagpadulong sa mga lugar nga makapalipay sa aton, matalupangdan naton nga indi dapat tuman ka damo sang aton bagahe, indi dapat mag-alalawas ang aton pagkaon, kag mas masadya kon ang tanan may bitbit nga mga kinahanglanon nga mapaambit sa tanan.

Mas manami ang magpamalandong paagi sa paghambilay sa sabak sang kalibutan, sa iya kagulangan, sa iya lasang, kag mga kabatuhan. Mahugasan sang bag-o nga panimuot ang paminsaron nga marikot sang mga manami nga lalantawon, sang daludo sang ilig sang tubig sa busay kag sang mabugnaw nga tubig sang lawod.

Malinong ang palibot, matawhay ang panimuot; malayo ang tulok, kalmante ang utok; kag nagasangkad ang panan-awan sa bulig sang nagatabuay nga langit kag lawod.

Sa bulig sang mga duna nga bagay sa aton palibot, makita naton ang kahulugan sang aton kabuhi. Mapaanggid naton ang aton sitwasyon sa bato, sa balas, sa balud, sa daludo sang tubig, kag sa halos tanan nga bagay nga naga-igsister kaangay naton sa sini nga kalibutan.

Maathag nga ang kahulugan sang aton kabuhi aton maapresyar paagi sa mapuslanon nga pagpanglakaton./PB 

[/av_textblock]

[/av_one_full]

LEAVE A REPLY

Please enter your comment!
Please enter your name here