PAUTWAS!

BY JOEL FRANCO

Tuesday, November 14, 2017

INDI mahimutig nga ang mga utilities madamo gid sang problema. Indi nila ma-perfect ang ila serbisyo sa publiko.

Halimbawa lang diri ang tuman ka-dismal nga performance sang Metro Iloilo Water District (MIWD), mga electric cooperatives kag ang Panay Electric Company (PECO). Bisan pa nga tanan ini sila may mga kapaltahan, nasentro karon ang kanyon sang mga kritiko sa PECO.

Matuod madamo sang mga kapalpakan ang PECO. Kag husto man ina nga may mandato sila nga maghatag sang husto nga serbisyo kay kun indi, mahimo ini ang kabangdanan nga indi ma-renew ang ila franchise ukon mas malala pa kun i-take over sang gobyerno ang ila operasyon.

Kita sa media ginaulan man sang reklamo kontra sa PECO. Pero ini bala nga mga problema nagakadapat nga kabangdanan agud indi pag-i-renew sang Kongreso ang franchise sang PECO?

Kun ikaw kontra sa PECO syempre manindugan ka kontra sa renewal. Kapin pa kun nangin biktima ka sang ila kapalpakan.

Ang pamangkot: Ini bala nga mga kapalpakan sang PECO wala nila ginatadlong?

Kun i-takeover bala sang gobyerno ang PECO mas pabor sa mga Ilonggo? Makapaayo bala sa syudad kun cooperative ang aton power distributor?

Anay ka…indi bala sa probinsya cooperative sila? Ileco 1, 2 kag 3. May Capelco ang Capiz, Akelco ang aklan, Guimelco ang Guimaras, Ceneco kag Noneco ang Negros?

Kumusta naman ang serbisyo sang mga kooperatiba? Nalipay bala ang mga konsumidor sa ila serbisyo? Indi bala nga pila ka bulan ang nakaligad patay sindi man ang suga sa probinsya? Grabe man ang wangal sang mga konsumidor. Problema nila sa probinsya, problema man sa syudad.

Handa bala ang gobyerno nga mag-takeover sa PECO santo sa ginaduso sang iban? Madali ang takeover pero paano ang magpatikang?

Nakita nyo naman ang mga government-owned and -controlled corporations nga naalimunaw lang. Madamo man sang mga ginpa-sequester sang una ang gobyerno nga kumpaniya nga wala gid sang maayo nga dinangatan. Halimbawa diri ang IBC-TV 13 kag RPN TV-9 kag ang diri sa atun sang una ang kilala nga National Sugar Refinery Corp. (NASUREFCO) nga ginapanag-iyahan sang mga Benedicto. Ano ang natabu sa ila? Sa diin na sila subong?

Imbes bala nga mag-asenso ang pasilidad basi magbalik sa makalulooy nga sitwasyon. Nagasulod na gani ang gobyerno sa Public-Private Partnership agud indi matam-an ang gobyerno tapos ma-takeover pa sang isa sa pinakadako nga kumpaniya?

Ang solution diri indi takeover kundi ang hugot nga implementasyon sang kasuguan angut sa power distribution.

Sala man ina sang gobyerno kag mga balingag ang ara sa poder. Dapat magtrabaho ang Energy Regulatory Commission (ERC) kag indi lang maghulat sa ila opisina.

May mas epektibo pa dira nga solusyon, indi ang makatalagam nga government takeover. Napamatud-an na nga bad businessman ang gobyerno! (jpranco1975@gmail.com)/PN