WESTERN VISAYAS MALINONG

Ni Ime Sornito

Syudad sang ILOILO – Ginakabig gihapon sang Police Regional Office (PRO) 6 nga “generally peaceful” ang bug-os nga Western Visayas sa pihak sang pagpanghalit sang gina-alegar mga katapo sang New People’s Army (NPA).

“We would like to inform everybody that region 6 is generally peaceful and stable despite the Maasin incident and the ambush committed by alleged CNN against our troop in Sibalom,” hambal sang tagpamaba sang PRO-6 nga si Supt. Gilbert Gorero.

Sandig sa datus sang PRO-6, wala sang narekord nga dalagku nga krimen nga maka-apekto sa peace and order situation sa rehiyon.

Dugang ni Gorero nga wala sang narekord ang PRO-6 nga pinatyanay nga ginadalahigan sang politiko ukon durogista, wala man sang insidente sang kidnap for ransom, robbery, kag terrorist bombing.

“The overall picture of our peace and order is negative to major crime incident. At present, the region has not recorded any profile crime, political killings, liquidation of any drug personalities, kidnap for ransom, robbery and terrorist bombidn incident,” siling pa sini.

Angut sini, ginpasiguro ni Gorero nga padayun ang pagpanghanda sang PRO-6 para malikawan nga matabu ang nasambit nga mga krimen nga magatublag sang malinong nga rehiyon.

Matandaan nga ginpuhag sang duha ka dalagku nga insidente sang ambush ang rehiyon sang nagligad nga semana.

Ang una amo ang pag-ambush sang indi magnubo 30 tubtob 50 ka mga rebelde sa patrol car sang Sibalom PNP sa Barangay Pis-anan, Sibalom sadtong Nobyimbre 22 nga ginkasamad nanday Police Officer 3 Gabby Orantes, PO3 Michael Alejo, PO3 Salvador Cordero, kag PO1 Jonard Laguna.

Ginsundan ini sang pag-ambush sang mga rebelde sa mga katapo sang Regional Mobile Force Troopers nga nagasakay sa 6×6 truck sa Barangay Bolo, Maasin, Iloilo sadtong Nobyimbre 24 nga ginkapatay ni PO1 Joeffel Odon kag ginkasamad sang 12 ka iban pa./PB