Ni Cyrus M. Garde
Syudad sang BACOLOD – Duha sa lima ka pamantan-on ang nakita nga mga bangkay na kahapon sang aga matapos nalumos, samtang isa pa ang ginapangita sang mga otoridad sa Isabela, Negros Occidental.
Mga alas-6:30 sa aga kahapon, ang bangkay nanday Michael Kenn Amantoy Peuda, 17 anyos kag pumuluyo sang Hacienda Maria Cecilia, Brgy. Crossing Magallon kag Ronil Tadena Miraflores, 19 anyos sang Brgy. Baliwagan, San Enrique, Negros Occidental, nakita nga gin-apok sa suba sang Hda. Antolanga sa Brgy. Tinongan, Isabela.
Ang wala pa makita nga upod sini nila amo si Jason Baladhay sang Brgy. Crossing Magallon samtang nakaluwas naman ang duha nila ka upod nga sanday Larry Baladhay, 22 anyos kag Dexter Pendan, 19 anyos, lunsay residente sang Brgy. Maytubig, Isabela.
Sunu sa pulis, ang lima nagkadto mga alas-nueve sa aga sang Miyerkoles sa suba sang Hacienda Pilar, Brgy. Crossing Magallon, Moises Padilla agud manikop sang pasayan kag isda.
Apang mabaskug ang sulog (water current) kag gin-anod gid sanday Peuda, Miraflores kag Baladhay nga lunsay indi makahibalo maglangoy.
Samtang ginasulat ini nga balita, padayun pa ang search and rescue operation sang mga rescue teams gikan sa Isabela, Moises Padilla kag Hinigaran./H
