MABULIGAN na ang mga gradwado sa ila mga kurso nga nagakinahanglan nga magkuha sang board examination antes lubos nga mangin propesyunal.
Nakita ni Iloilo Vice Governor Christine “Tingting” Garin nga dapat mabuligan ang mga estudyante agud nga makalampuwas sa pasinawan nga ginahatag sang gobyerno agud nga mahatagan sila sang angay nga lisensya para sa ila napili nga propesyon.
Nahangpan sang bise gobernador ang sitwasyon sang mga estudyante. Bilang chairperson sang Committee on Education and Information sang 14th Sangguniang Panlalawigan ng Iloilo, ginduso sini ang ordinansa agud nga mabuligan ang mga iskolar sang probinsya sang Iloilo tubtob nga makapasar sa ila board examination.
Ginkalipay sini nga ginbuylugan sang iya mga kaupod sa Provincial Board ang pagpasar sang Provincial Ordinance No. 2024-321 nga may tigulo “An Ordinance Granting Financial Assistance to the Graduate Scholars of the Province of Iloilo for Their Review in the Board Examination on Respective Fields of Endeavor”.
Natigayon ini nga mapasar sa Third and Final Reading sa 104th Regular Session sadtong Agosto 6, 2024.
Katuyuan sang “Review Financial Assistance for the Scholars” ordinance nga mapamag-an ang gina-abaga nga problema pinansyal sang mga magakuha sang pasinawan kag agud nga makapokus sila sa ila review kag mapasaka ang tsansa nga makapasar sa pasinawan.
Ginatumod nga mga iskolar amo ang mga iskolar sang Scholarship Program sang Probinsya sang Iloilo nga ginalakipan sang Iskolar Sang Iloilo Program (ISIP), Educational Assistance for the Marginalized and Deserving Indigenous People, Scholarship for Persons with Disability (PWD), Scholarship Program for the Children of OFWs who are in Crisis Situations, kag iban pa nga posible scholarship program nga ipatigayon sang Iloilo Provincial Government sa palaabuton.
Magapain sang pondo ang Iloilo Provincial Government paagi sa Human Resource Management and Development Office agud itan-ay ang financial assistance nga 10,000 pesos sa mga graduate sang nasambit nga mqa iskolar nga luyag mag-review ukon self-review kag magkuha gilayon sang board examination ukon sa sulod sang duha ka tuig pagkatapos sang graduation.
Kwalipikado diri amo ang residente sang probinsya sang Iloilo sang kapin anum ka bulan, aktibo nga botante sang probinsya sang Iloilo, dapat graduate scholar sang probinsya sang Iloilo, kag first taker sang Board Examination.
Luyag sang bise gobernador nga lubos ang paghatag sang ayuda sa mga iskolar sang probinsya tungod kanugon nga gradwado sila sa ila kurso apang indi lubos nga mangin propesyunal kag makakita sang trabaho agud nga makabulig sa ila panimalay tungod nga wala pa nakapasar sa board examination.
Suno sa Commission on Higher Education (CHEd), ang ginalantaw nga attrition rate ukon ang kadamuon sang mga estudyante nga nag-drop out sa mga unibersidad kag mga kolehiyo sa school year 2023 tubtob 2024 sa karon yara sa 35.15 percent, medyo manubo ini sa 40.98 percent sang nagligad nga tuig.
Bisan pa nga nagnubo ang porsyento sang nag-drop out apang ang realidad nagasiling nga may drop out sa gihapon kag ini sila ang madulaan sang higayon nga mabatak nila ang kahimtangan sang ila pangabuhi paagi sa edukasyon.
Posible nga bangud ina sa madamo nga scholarship program nga ginatan-ay sang gobyerno kag pribado nga sektor nga nagahatag sang daku nga paglaum sa mga estudyante nga magpadayon tubtob makatapos sa ila pagtuon.
Kahibalo man kita nga ang kapigaduhon amo ang nagasablag sa pagpanglakaton sang mga estudyante nga makatapos sa ila kurso. May sitwasyon nga libre ang matrikula kag iban pa nga balayran sa eskwelahan apang indi malipod nga may galastuhan nga iban kaangay sa ila mga aktibidades sa eskwelahan kag iban pa nga mga hilikuton.
May balayran man sa ila boarding houses, kuryente, tubig, pagkaon, internet kag iban pa apang nagamag-an lang ang tanan kon iskolar ang estudyante tungod nga indi na siya magproblema sa dalagku nga balayran sa tuition kag matrikula. May mabaton pa siya nga allowance para sa libro, uniporme kag iban pa.
Makita naton ang bentaha kon iskolar ang estudyante tungod wala nagadalok ang gobyerno sa paghatag sa iya sang higayon.
Importante lang nga ipadayon sini ang disiplina, ang dedikasyon kag kakomitido sa paglab-ot sa iya mga handom kag pag-usoy sa banas padulong sa masanag nga palaabuton.
Labaw pa gid nga bentaha kon iskolar siya sang Iloilo Provincial Government tungod nga pagkatapos niya nga makagradwar sa iya kurso kag kon kinahanglan nga magkwa sang board exam, yara sa gihapon ang ayuda sang kapitolyo tubtub mangin lubos siya nga propesyunal.
Daku nga bagay ini nga dapat pasalamatan sang mga iskolar sang Iloilo Provincial Government sa nagakabalaka, naga-ulikid, kag naga-atipan sa ila nga si Vice Governor Christine “Tingting” Garin. (bertladera@gmail.com/PN)
