NAPULO’G isa (11) gid ang nagdaug sa mga kandidato sa pagka-konsehal sang nagligad nga eleksyon sa grupo ni Iloilo City Mayor Raisa Sarabia Treñas-Chu, samtang isa gid lang ang nagdaug –si Konsehal Sheen Mabilog – halin sa grupo ni Cong. Jam Jam Baronda.
Si Mayor Raisa katapo sang Nationalist People’s Coalition (NPC) upod sang iya kapartido kag ka-coalition sa Konseho, samtang si Kongresista JamJam Baronda kag iya mga kagrupo katapo kag kaugyon sang Lakas-CMD.
Isa pa, ang SK chairman kag presidente sang Liga ng mga Barangay kagrupo man ini sila ni anay Mayor Jerry Treñas kag sang nagdalaug nga mga konsehal.
Kon may kaugyon man sa Konseho si Mabilog, ang kapartido lang sini nga si Vice Mayor Love-Love Baronda nga ang rolyo sini sa Konseho amo lang ang mag-preside sa sesyon kag magboto kon may patas nga boto.
Ex-officio member matuod si Vice Mayor Baronda sang 32 tanan nga mga komitiba, apang indi ini makabulig gid kay Mabilog. Ina tungod kay indi siya makapakigbahin kag makaboto sa deliberasyon sang plenaryo, ukon kabug-usan sang Konseho, luas lang sa pagboto kon may magpatas.
Isa pa, sandig sa aton Demokrasyahanon nga pang-gobyerno, nga nagasikway sang diniktador nga pangginahum, may ginakilala dira sa Konseho nga Ruling Party (ukon coalition) nga ginagamhan sang Mayoriya nga grupo, samtang ang Minoriya nga grupo ang nagadala sang obligasyon sang Opposition Party (ukon coalition) bilang Fiscalizer.
Bilang Fiscalizer, ang Minoriya gina-expectar sa pagbantay sang pagpatikang sang kaban sang siyudad kag ang posible nga pagpatumbaya sa serbisyo kag korapsyon sa gobyerno.
Poder naman sang Ruling Majority ang pagpamuno sa pagpatuman sang kaayuhan sang mga pumuluyo, sandig sa ila ginpangako sa mga pumuluyo nga nagpadaug sa ila sang nagligad ng eleksyon.
Tungod sini, ang Mayoriya ang may kinamatarong sa pagpili kon sin-o sa mga konsehal ang mamuno sang nagakalain-lain nga mga komitiba. Gani indi katingalahan kon bisan isa sa Opposition ang indi matagaan sing chairmanship sang komitiba.
Apang indi man imposible nga matagaan sang chairmanship sa komitiba ang Opposition. Katulad sang natabo sa Cebu City Council sadtong 2022, kag sa nagliligad pa nila nga mga Konseho.
Sunu sa AI, kon korek ang report sini, sadtong 2022, si opposition councilor Nestor Archival na-appoint bilang chair sang Committee on Environment. Subong man si Cynthia de la Torre, sa Committee on Women and Family Affairs. Ginhimo ini sang Cebu City Council, sa pagpamuno sang Mayoriya, “to foster collaboration between majority and minority parties within the council”.
Apang wala ini mahimo sang Iloilo City Council, nga wala matagaan sing chairmanship sang komitiba si Mabilog. Ngaa ayhan?
Sa nahibal-an ta halin sa mga balita, naghisugot si Mayor Raisa kag Vice Mayor Baronda nga magbinuligay ang ila grupo agud mahatag ang mas masangkad nga kaayuhan sa siyudad. Pero, ngaa wala matagaan sing chairmanship sang bisan isa lang ka komitiba si Mabilog?
Una, tungod ang Konseho independent body kag may kaugalingon man nga pamensaron sa Executive bisan magkagrupo sila.
Ikaduha, tungod seguro kay ang ginapangayo ni Mabilog gina-obligar na sing mabungahon sing madugay nga panahon sang yara gihapon sa pwesto halin sa nagligad nga Konseho, nga indi nila masalig sa bag-uhan nga konsehal katulad ni Mabilog.
Gani, mas gustuhon sang Mayoriya nga mangin myembro na gid lang si Mabilog sang komitiba kon diin maka-upod man siya sa deliberasyon sini. Ginpangayo sadto ni Mabilog ang mga komitiba sang Edukasyon kag Labor & Employment.
Well, indi man nangin problema ini sang mga konsehal sa Opposition katulad nanday Perla Zulueta, kag Joshua Alim kag Plaridel Nava sa ila kapanahunan.
Sa ila ginpakita nga kinaalam, experyensya sa panghimanwa, kag kaisug napamuklat man nila ang Mayoriya, kag ang mga pumuluyo, sa bagay nga pagtadlong sa ginaduso sang Mayoriya nga mga hagna kag hilikuton, luas sa ila man kaugalingon nga mga inisyatibo.
Segurado naton nga mahimo man ini ni Mabilog. Tapos siya sa Bachelor of Politicial Science nga nagahanas sa pagdebate (sa subject nga Argumentation and Debate) agud madepensyahan sing maayo ang iya mga panindugan sa pagbulig man sang iya abogado, katulad ni Atty. Rex Salas nga sadto legal consultant ni Zulueta samtang indi abogado.
Nangin kabahin man si Mabilog sang gobyerno sadtong tsirman pa siya sang SK kag ex-officio nga konsehal, kag assistant ni mayor sa pagpalakat sang gobyerno. Kag sa padayon nga pagtuon, katulad sang ginahimo sadto ni Zulueta, gasalig kita nga mangin mas mabungahon man ini sa iya rolyo sa Konseho.
Good luck, Konsehal Sheen Mabilog! Pwede ka man mag-“play dirty”sa posible nga matudlo sang kagrupo mo, pero mas angayan ka, sa imo ginpakita nga ugali sang tsirman ka pa sang SK, sa pagpasanyog lang sang “constructive criticism”./PN
