SA PANUGOD pa lang sang pag-imbestigar sang Senate Blue Ribbon Committee (SBRC) sa flood control project anomaly (FCPA), sa pagpamuno ni Senator Rodante Marcoleta, may suspetso na nga indi maayo ang publiko.
Kag ina agud pakalainon ang administrasyon ni Presidente Marcos Jr. bisan pa ang Presidente mismo ang nagtulak sang imbestigasyon sang FCPA sa iya 2025 SONA sadtong Hulyo 28.
Nga daan kaugyon ni Marcoleta sa mayoriya ang mga diehard pro-Duterte nga mga senador nga sanday Bato dela Rosa, Bong Go, Robin Padilla, kag Imee Marcos, nga gin-updan man sang iban nga mga senador nga luyag makatilaw sang pan de sal samtang mainit pa.
Natublag ugaling sila sang ginpa-imbestigar ni Senador Panfilo”Ping” Lacson ang mga proyekto sa Bulacan nga, incidentally, nagtudlo sang pagbaton sang kickback ni Senador Joel Villanueva sang PhP30 ka Milyon.
Kahimbon pa gani ini sang mga DPWH official upod sa mga contractor agud mapadasig ang pagtigayon sang mga proyekto nga ila gindaug sa bidding.
Ang ginatumod diri nga mga contractor amo ang mag-asawa nga Curlee kag Sarah Discaya nga may siyam (9) ka kompaniya nga nakadaug sa bidding sang govt-funded project dira sa Bulacan kag sa iban pa nga parti sang pungsod.
Nagwa man sa mga imbestigasyon sa Bicol nga may kasubong nga kickback nga PhP30M nga nabaton ni Senador Chiz Escudero, luwas sa pag-angot pa sa iya kag iya pamilya sa pila ka proyekto sa Bicol.
Sa kabug-usan, ang mga pag-imbestigar sang SBRC kag sang Independent Committee on Infrastructure (ICI) nakadiskubre sang madamo lang nga anomaliya. Katulad sang SOP “commission”, illegal campaign donations, mga “tulong” kag sang kon ano pa nga mga “pabuya” halin sa mga contractor, nga nagresulta sa kapalpakan sang pagtukod sang mga proyekto halin sa nahiwa na sing tadtad nga mga project funds.
Nalamita man sa mga imbestigasyon ang 21 ka kongresista nga, sunu sa sources sang ICI, nakabaton man sang kickbacks nga nagresulta sa ghost projects, nga sunu sa COA, galakip sang mga proyekto nga substandard, “completed” kuno gali kay poste pa lang ang nagatindug, kag ang indi ma-locate, ukon sa “guni-guni lang” sunu gani sa Presidente.
Sa pagkambyo sang lealtad, ugaling, natukod ang bag-o nga mayoriya sa Senado nga ginapangunahan na ni Senador Tito Sotto bilang Senate President kag ni Lacson bilang tsirman sang SBRC.
Kilala sa pagkaisganan si Lacson bilang Chief PNP kag sang limpyo niya nga record bilang senador sa sulod sang tatlo ka termino tubtub karon, gani ginsaligan siya sa pagpamuno sang SBRC.
Kag nagdugang pa ang kaisog sang SBRC agud mag-expose sa ila BUNAYAG kag BUKAS sa publiko nga pag-imbestigar sandig mismo sa mando sang Presidente nga “iguon ang dapat iguon nga wala sang pinilian”.
Samtang padayon man ang pag-validate sang mga impormasyon nga nagaabot sa ICI, lakip ang halin sa SBRC, agud mapasaka na ang mga kaso sa Ombudsman kag sa Sandiganbayan kon diin dapat ipasaka.
In fact, sunu kay DPWH Sec.Vince Dizon nakapasaka na gani sila sang kaso sa 25 ka DPWH official sa Ombudsman.
Kag sa pagpadayon sang imbestigasyon sang SBRC napadaluman pa ang kaso sang mga senador nga nalamita sa anomaliya. Kag kon sin-o ang bagay nga mga state witness, ukon whistleblower, agud maipit gid sing husto ang mga suspetsado.
Ginkwestyon ini nanday Escudero kag Villanueva kay kuno ngaa sila gid ang ginatutukan kag ngaa wala sing may nalakip nga mga kongresista, nga sang nahibal-an nila sa ulihi, may 21 na gali ka kongresista nga gina-imbestigar sang ICI.
Gin-insistir man ni Marcoleta nga himuon state witness ang mag-asawa nga Curlee kag Sarah Discaya. Ginbalabagan ini ni Lacson kay indi sila maka-qualify. Sunu sa kasuguan, “The state witness must not be the most guilty person in the crime.”
Na-iskandalo na ang mga palpak nga mga proyekto sang mga Discaya kag laban-laban sila gid ang “most guilty”.
Gintudlo man ni Lacson ang “conflict of interest” ni Marcoleta bangod ang iya gali asawa opisyal sang Stronghold Insurance nga nag-issue sang surety bond para sa mga proyekto sang mga Discaya.
Tungod sini, nagagwa nga luyag gid ni Marcoleta nga mangin state witness ang mag-asawa nga Discaya agud mahilway sila sa kaso. Kliyente gali sila sang iya asawa.
Indi gid ugaling magpasubali si Marcoleta kag iya mga kaugyon sa minoriya, kag napilitan na gid lang mag-resign si Lacson kay indi na niya mapadalagan sing husto ang SBRC sa sige panabad nanday Marcoleta.
Kag indi lang sa ina nga rason. Hambalon pa, kon indi si Lacson mapasugtan agud mabuyagyag ang tanan sa publiko, maayo pa matuod nga mag-resign na gid lang siya.
Maayo na lang nga magpabilin siya nga “true to his job” sangsa pasugtan ang luyag sang iban nga makapahuyang sang kredibilidad sang SBRC sa atubangan sang mga pumuluyo.
Nga ginakahadlukan naton nga makapadabok pa sang reklamo sang mga pumuluyo. Husto! Kon Lapsus Calami pa ang pahambalon./PN
