SA ISA ka tion sang akon online research angot sa aton kolum diri, natsansahan ko ang isa ka artikulo ni Kristoffer Brasileño parti sa mga visual artists, nga nabalhag sadtong Nobyembre 8, 2015 pa.
Gin-share niya diri ang larawan sang nagdalaug nga mga entry sa Arte de Kalye nga pa-contest – 1st, 2nd, 3rd kag 7 ka consolation prizes – nga, sa hangop ko, siya mismo ang nagpatigayon.
Kon wala ako magsala, nakasalamuha ko na ini si Brasileño, nga visual artist kag art professor, sang nangin myembro ako sang isa ka grupo sang visual artists nga nakabase dira sa Museo de Iloilo nga ang ila mga ubra ginasakdag sang Museo paagi sa pag-display sang mga ini sa Museo display room nga mabakal man sang mga bisita.
***
By the way, sa nadumduman ko, may Spanish coin (19th century) ako nga gintugyan i-display sadto sa Museo nga gin-request sa sulat ko nga ibalik sa akon apang wala gid ako nakabaton sang sabat sang Museo.
***
Frankly, indi ako kasubong nila nga may pinasahe (remarkable) nga abilidad kag kilala sa visual art at least diri sa Iloilo.
Kon may diutay ako nga mapakita sa visual art, ang natandaan ko lang nga isa ako sa duha sa amon klase sa elementarya nga gintagaan sang pribilehiyo nga maka-display, upod ang ginpasakop man sang iban nga eskwelahan, sa isa ka United Nations art showcase para sa mga kabataan nga indi ko na madumduman.
Ang kaupod ko sadto ang mas kilala sa pag-drowing sa amon klase. Nangin abogado siya, ugaling wala na ako sang balita sa iya.
***
Kon nangin myembro man ako sang Hubon (nga indi ko na matandaan ang lubos nga pangalan) sang mga visual artists sa Iloilo, ina tungod nakilala ko sila bilang general reporter sang Panay News sadto nga kon kis-a nagaduaw sa Museo agud may makuha nga balita sa ila, nga tungod seguro sang mabulig ko sa ila ginbaton nila ako nga myembro sang Hubon.
Nangin masami man gani ang pagduaw ko didto sa Museo sa ginahiwat dira nga pagpanudlo sang Hubon sa mga maluyag magtuon sa basic visual art nga ginabayaran sang ila mga ginikanan.
Wala ako ma-display nga painting work sa display room sang Museo kay pangbata lang ang kaya ko, gani ginhingyo ko sa ila nga tugtan ako mag-display lang sang isa ka Assemblage project, nga popular man nga visual art sa Uropa although indi diri sa Filipinas.
Sa ini nga klase sang visual art, kinahanglan mo lang ang creativity sa pag-assemble sang kon ano-ano nga mga bagay nga ma-apreciar man sang tumalan-aw.
Nakabakal ako sang napamala (dried) nga ulo sang daku gawa nga baby shark nga sa bukas nga baba makita ang makahaladlok nga mga ngipon, katulad sang makita mo sa promo sang pelikula nga Jaws.
Gin-display ko ini sa isa ka lameseta malapit sa display wall, nga upod sang pila ka ocean shells kag ginsulatan sang mga apat ka linya sang simple nga binalaybay.
Aba, may nakamutik man sa mga nagabisita sa Museo. Una, seguro tungod sa makangilidlis nga mga ngipon sa naganganga nga baba ni baby shark. Kag tungod man seguro kay nagaisahanon lang ato nga assemblage art work sa display room. Ang tanan nga iban pulos mga painting. Ang regret ko lang kay wala ko ini ma-preserve for posterity sake kay gin-it-it seguro sang mga ilaga sa gintaguan ko.
***
Interesado gid si Pedro kon ano na ang natabo sa kay Cavite 4th District Congressman Kiko Barzaga.
“Daw gapabuang-buang man lang siya, ngaa gin-suspend gid si Kiko?” siling ni Pedro. “San-o, kag ngaa?” dugang nga pamangkot ni Pedro.
Sunu sa mga balita, siling ko, sadtong Disyembre 1, 2025. Halos bug-os gid sang Kamara – 249 ka boto pabor sa suspension, 5 kontra, kag 11 ang abstain.
Bangod sa “Respondent’s reckless, offensive, and irresponsible use of his social media platform (that) tarnishes the name, integrity, and reputation of the House of Representatives,” sunu sa committee report sang House Ethics Committee, nga ginapamunuan ni committee chair JC Abalos.
Natalana ang suspension ni Kiko sa sulod sang 60 ka adlaw, nga may pamahog pa sa iya sing “more severe disciplinary action” kon sigehon pa sini inang online “disorderly behavior”.
Ang suspension ni Barzaga bunga sang reklamo mismo sang iya kapartido sa National Unity Party sa iya online social posts nga nagapakalain sang kababaehan kag gapanubo sang integridad sang mga government institutions.
Naakusahan man si Barzaga sang Inciting for Rebellion kag Sedition sa iya pahayag sa iya online post nga dapat sunugon ang Batasang Pambansa (Congress).
Tungod sining iya suspension, ginadumilian siya sa pag-attend sang mga sesyon, magbaton sing sweldo, kag paggamit sang iya upisina sa Kamara.
Ginpamahog man ni Barzaga, upod ang pila ka usyoso, sang Nobyembre 30 protest rally ang mga nagapuluyo sa Forbes Park kon diin may mansion dira si pambansang kamao nga si Manny Pacquiao kag iya pamilya upod sa mga manggaran, business execs kag mga diplomatiko.
Tungod sini, kon matuod, ang balita gasiling nga ginapabaligya na ni Manny ining mansion niya dira nga gabalor sing PhP2.3 Bilyon. Hadlok man seguro si Manny malakip sa mga korap dira sa Forbes Park./PN
