NAGLANOG ang balita nga pormal nga nagpahayag sang iya intensyon nga magpapili sa pagkapangulo si Bise Presidente Sara Duterte.
Bisan pa nga madamo na ang nagapati sadto pa sa sini nga plano apang tuhay ang sitwasyon kon mismo ang natungdan ang magabungat kag pormal nga ipahayag ang iya tinutuyo.
Sa pagkamatuod, pormal nga pagbungat gikan sa bise presidente ang ginahulat sang tana. Nagabantay man ang mga kritiko kag masami nga naga-atake sa iya.
Ang pamangkot subong kon nagtayming bala ang iya pagtuad sang iya tinutuyo sa dalagan sang sitwasyon sang Pilipinas sa subong nga panahon?
Sa akon personal nga paglantaw, nakalkulo na ni VP Sara Duterte ang tanan. Kahibalo siya nga ang pagpasensya isa ka kusog nga indi mapunggan kon tion na nga buy-an. Kahibalo siya magbasa sa dalagan sang panahon, sa mga patimaan sang sitwasyon kag kon san-o dapat ihakyaw ang iya armas bilang signos sa panugod sa pagpakig-way para a mga pumuluyo.
Samtang gina-atake siya, wala nagakalingkang ang pagsalig sang pumuluyo sa iya, kag padayon lang nga nagasaka suno sa mga asud-asod nga survey nga ginhiwat sang damage lang.
Bangud sini, nakita sang iya mga kasumpong nga mabudlay siya nga pukanon. Nagapati man ang mga political analyst nga kon subong ang eleksyon, wala sang may makalutos sa iya.
Maathag nga mabakod siya nga kasumpong sang administrasyon kag wala sang iban nga kandidato nga makasarang magbunggo sa iya.
Ang iya pag-anunsyo patimaan sang paglinya sang mga nagabalang-balang nga grupo nga wala pa sang klaro kon sa diin sila maupod. Signos man ini sa mga nagapanukot sa mga dapat may salabton sa anomaliya sa flood control project nga kutob subong wala ang klaro ang dalagan sang imbestigasyon, bisan pa nga may mga ginpang-akusar, apang indi kuntento ang tawo sa dalagan sang sitwasyon.
Luyag sang pumuluyo ang isa ka lider nga may direksyon kag naga-atinder sa kinahanglanon sang pumuluyo. Maathag man nga nagabalang-balang ang ekonomiya, indi mabutigan ang matag-adlaw nga trasaksyon sa stock market, sa bayluhanay sang peso batok sa dolyar kag ang sagunson nga pagsaka sa presyo sang gatong.
Luyag sang pumuluyo nga may manabat sa kagarukan nga ginahimo sa gobyerno, nga dapat mauntat na ang asud-asud nga krimen bisan pa nga ginapabugal sang kapulisan nga nagnubo ang crime rate.
Luyag sang pumuluyo nga matapna na ang kinilo-kilo nga pagdata sang ilegal nga druga. Matuod nga madamo sang nagkaladakpan apang indi masabat kon ngaa wala sang kasolbaran kag indi matumod kon sa diin ang source.
Nahidlaw na ang tawo magtaris sa matawhay nga dalan sa panahon ni Digong, indi kaangay subong nga puro lang parking kag baligya ang masiot nga kalye nga nagapaigod sa dalagan sang salakyan.
Indi makita pero mabatyagan ang paghina sang ekonomiya, madamo sang negosyo ang nagasarado bangud indi kasarang ang mga customer sa presyo. Mahal ang balayran sa renta, mahal ang balaklon, mahal raw material nga ginagamit,mahal ang mga panakot ukon ingredients.
Tungod sa anomaliya sa flood control project, nakunol ang konastruksyon kabangdanan nga madamo ang wala sang trabaho.
Kadamo sang problema ang Pilipinas apang ang kamrasanay sa pulitika ang gina-atinder sa ibabaw. Makaluluoy ang yara sa idalom. Nagapangita sang paaliwansan, nagapangita sang sandigan. Nagahandom ang paglaum.
Ang anunsyo ni VP Sara Duterte nakahatag sang iwag sang buron nga kapawa. Naghatag sang paglaum sa ginakapoy nga kalag.
Ang iya pahayag magahimo sang kurit sa Kamara, magawahig para sa bag-o nga linyada. Kahibalo si VP Sara Duterte nga indi solido ang Kamara para sa bag-o nga impeachment nga ginpasaka batok sa iya. Nagapang-alang-alang na ang mga kongresista nga mag-upod sa paslaw nga kawsa sang nagpadihot batok sa iya.
May lantawon na nga salandigan ang mga negosyante kon paano makatibawas sa nagahunyango nga negosyo. May bag-o nga paglaum para sa ila agud mas magpag-on ang dalagan sang ekonomiya.
May balasehan na ang mga lideres sa idalom kon ano ang ila masunod nga hulag para sa palaabuton nga eleksyon sa 2028.
Ang kalagingay nagasugod na. Ang linyahanay nagasugod na.
Magaplastar na ang iban sang ila grupo kag mangita sang mga emisaryo agud makapalapit kag makadikit sa mas mabaskog nga Partido.
Kahibalo na si VP Sara Duterte sa mga diskarte sang pulitiko. Ini ang rason kon ngaa wala siya sang koneksyon nga mga pulitiko tungod kahibalo siya nga indi sila masaligan. Mas nagatutok siya sa pagserbisyo sa tawo tungod tawo ang nagpapungko sa iya sa pwesto.
Kon sadto naghugpong sila sa pagsinggitan sang “Never Again,” posible nga sa sini nga eleksyon magasinggitan naman sila sang “Together Again.”
Sa isa ka pormal nga pahayag ang kapawa sang Pilipinas liwat nga nagsanag. (bertladera@gmail.com/PN)
