NAGTUGA sang kinagula ang pagdumili sa mga nagabolante nga makabaligya sang ila produkto sa mga dalanon sa palibot sang bag-o nga Iloilo Terminal Market.
Gin-insister sang syudad nga may ordinansa nga dapat ipatuman, nga dapat sundon ang market ordinance nga nagadumili sa pagbaligya sa sulod sang 100 metros gikan sa merkado.
Suno sa syudad, dapat ipatuman ang Iloilo City Market and Slaughterhouse Code of 2009, ilabi na ang Section 46.
Tungod sini, maabtik nga naghulat ang syudad paagi sa iya Public Order and Safety Management Office (POSMO), Traffic and Transportation Management Office (TTMO), Local Economic Enterprise Office (LEEO) Anti Squatting and Illegal Structure Unit (ASIS-U).
Nakita naton kon paano sila kasupog sa pagpatuman sang ordinansa. Kon lantawon, halos napangapinan gid nila ang Iloilo Terminal Market. Wala sang may nahimo ang mga nagabolante sa pwersa sang mga tinawo sang syudad.
Naghawan ang dalan, nagpaiway ang mga nagabolante kag padayon nga ginabantayan sa matag-adlaw nga tanan agud nga wala sang may malipat kag magbolante liwat sa mga dalan nga ginadumilian.
Dalayawon ang ila kahugod. Kuntani kaangay man nga kasugpog kag kahugod ang ila himuon sa mga dalanon sa syudad kon sa diin madamo sang mga nagabalabag sa dalan, madamo sang sablag, nagapakitid sa alagyan nga nagaresulta sa paghinay sang ilig sang salakyan kag pagkaatrasar sa mga ginapadulungan.
Nagalaum kita nga wala sila nagapili sa mga lugar, nagahulat sa pagluntad sang sitwasyon, ukon pagpangapin sa interes sang mga nagamandu sa ila.
Kuntani ireport man nila sa pumuluyo ang ila nahimuan, ang mga nahawanan nga mga dalan, kag ang pagtuman sang ila mga katungdanan nga nakahatag sang benepisyo sa mga pumuluyo sa syudad sang Iloilo.
Naga-ulhot lang ang ila ulo, nagalanog ang ila tingog, kag nagabika-bika sa atubang sang kamera kon may nga hitabu nga napun-an sang kontrobersiya.
Katungdanan nila, ilabi na sang Anti Squatting and Illegal Structure Unit (ASIS-U) nga ipatuman ang paghawan sang mga dalan, kakason ang mga illegal nga istruktura, kag dumalahan ang mga paglapas sa pag-upang agud mapasanyog ang katinlo kag kasulhay.
Madamo sang mga dalan sa syudad sang Iloilo nga may nagabarakang nga illegal nga mga istruktura, mga nagasaklam sa sidewalk, kag indi otorisado nga mga istruktura sa espasyo nga para sa publiko.
Ginhimo na nga parkingan ang mga dalan, madamo sang nakahilera nga mga salakyan nga nagasablag sa ilig sang trapiko, madamo sang mga baligyaan, kag ilegal nga signages.
Wala kita nakabati nga may gin-isyuhan sang notice of violation kag ginhingyo ang mga taglapas nga boluntaryo nga gub-on ang ila ginpatindog nga sablag.
Lantawa ang mga dalan nga ginpalapad para matawhay ang dalagan sang salakyan apang nagkitid na naman tungod nga ginhimo nga parkingan.
Dapat masami nga nagaluyong ang mga tinawo sang ila talatapan, masami nga nagapakig-angot sa mga punong barangay kon paano mapabilin nga hawan kag hilway sa sablag ang mga alagyan.
Sa subong, masami ang pagluntad sang sunog. Ang hawan nga alagyan may daku nga bulig agud gilayon nga marespondihan ang pagtuhaw sang kalayo, gilayon nga masulod sang bombero kag mapalong ang kalayo,
Luyag naton makita nga nagatrabaho man sila, indi lang sa panahon nga may nagaluntad nga kontrobersiya.
Luyag naton mahibaluan ang ila ginahimo nga takus sa sweldo kag benepisyo nga ginabaton nila sa gobyerno.
Basi kon bolantero lang ang inyo masarangan? Basi natahap kamo sa kabarangayan tungod sila mga botante sang syudad kag ang ila boto makaapekto sa mga kandidato?
Kon ano kasupog, dedikado, kag seryoso sila sa paghawan sa mga nagabolante sa dalan nga mga ginadumilian, kuntani kaangay man sina ang ila ipakita sa bisan diin nga bahin sang syudad nga may yara sang klaro nga nagatuga sang sablag.
Kon matuod nga nagalibot sila sa syudad, madamo sila sang makita kag mahatagan sang atensyon. Indi maglala ang problema sa kagutok sang dalanon,
Kon seryoso sila sa ila trabaho, indi na kinahanglan nga tundaan. Kon may ginahimo sila sa ila katungdanan, ang tawo na mismo ang makatalupangod kag sila ang pasalamatan.
Apang, makalilibog kon ngaa madugay na ang ila talatapan, may mga opisina nga makabuylog sa ila mga hulag, apang wala sang may makita nga pag-imprubar sa paghawan sang mga dalan.
Katungdanan ninyo nga hawanan ang mga dalan, ilabi na ang mga may sablag kag nagatuga sang kabudlay sa pumuluyo.
Ang trabaho ninyo indi lang para sa palibot sang mga bag-o nga merkado, ilabi na sa Iloilo Terminal Market, kundi sa tanan nga hilit-hilit nga ang sablag nagatuga sang halit. (bertladera@gmail.com/PN)
