MAKAAGOM gid sang masanag nga paglaum ang kahibalo mag-antus, ang nagabatas agud makapadayon kag nagahimakas nga makalampuwas sa mga hangkat sang panahon.
Nagpalayo siya sa syudad sang Iloilo sadtong 2017. Bisan masakit sa balatyagon, bisan magamo ang paminsaron, bisan ginaputos sang kakulba ang iya kaugalingon, apang nagapabilin ang iya pag-ulikid sa mga pumuluyo nga sa iya nagsakkdag kag nagtib-ong agud makapanghimanwa sa mga Ilonggo.
Malawig ang iya pag-antus. Ginlingaw ang iya kaugalingon agud nga madasig nga palion sang panahon ang pilas nga gintuga sang pagpakamaut kag alegasyon.
Nagpalayo siya sa kuko sang nagalagas sa iya. Nagpalipod sa gugma sang mga nagapalangga sa iya. Nagatangla sa kahawaan kag ginabasa ang signos sang panahon.
Nagbalik si anay Iloilo City mayor Jed Patrick Mabilog sa iya pinalangga nga syudad sang tuig 2024.
Nabulong ang kahidlaw sang mga pumuluyo. Madamo ang nagsug-alaw sa iya. Madamo ang nagbisita kag nagpangamusta. Madamo ang nalipay sa iya presensya. Apang, nakugmat ang mga kasumpong niya sa pulitika.
Sang Mayo 13,2026, nag-agaw sang atensyon ang balita nga nagsumpa siya bilang Undersecretary for Public Safety sang Department of the Interior and Local Government (DILG).
Nagbuklad ang bag-o nga pahina sang iya kabuhi. Gikan sa madulom nga inagyan padulong sa masanag nga kahimtang. Gikan sa kasubo padulong sa kalipay. Gikan sa kasakit padulong sa kasulhay.
Sa tuman ka damo nga inagyan sa kabuhi, madamo sang leksyon nga natun-an si Usec. Mabilog. Posible kahibalo na siya magkilatis sa mga tawo nga nagapalapit sa iya – kon tungod bilang siya, ukon tungod sa poder nga yara sa iya.
Nahibaluan na ni Mabilog ang matuod nga abyan, ang nagapakig-abyan lamang, kag ang nagapa-abyan-abyan tungod may kinahanglan. Nahangpan na niya nga ang poder kaangay sang magnet, madamo sang nagadikit, sang mga luyag nga makapalapit, kag luyag nga siya ang ila magamit.
Nahurma na siya sang pahanon, dagaya sa eksperyensya sa panghimanwa, kag kahibalo magbasa sa maunod nga yuhom kag yuhom sang isa ka malimbungon.
Angay siya sa iya bag-o nga katungdanan. Ginbugayan siya sang eksperyensya kag kaalam agud magamit niya para sa sini nga posisyon. Nahangpan niya ang limitasyon kag ikasarang sang local government unit. Makita niya ang kahuyang kag kusog. Makatugda siya sa paghatag sang solusyon agud ang pumuluyo ang syudad sang Iloilo kag bug-os nga pungsod makasiguro nga luwas sa mga katalagman – natural man ukon tungod sa kahimuan sang tawo.
Sa pagpahunay-hunay niya sadto, posible madamo siya sang nasumalang nga bag-o nga perspektibo sa panghimanwa. Ang iya palibot sadto nga nahamtangan naghatag sa iya sang dugang nga kaalam kag ideya kon paano mas epektibo nga mapangalagaran ang pumuluyo.
Kahibalo kita nga aktibo kag naga-akto si Usec Mabilog. Sadto pa man, nakita na naton ang sahi sang iya pagdumala, ang kaabtik sang iya pagdesisyon, kag ang paglantaw sa angay nga sitwasyon.
Sa iya bag-o nga posisyon, mas makilala siya sa bug-os nga pungsod, mas makatuon siya kon paano maghulag sa nasyunal nga lebel. Sa paghangop sa sistema sang pang-gobyerno kag makilala ang mga personalidad nga nagahulag kag nagapungko sa nasyunal nga mga posisyon.
Sa akon personal nga paglantaw, ginapreparar siya ni Cong. Jam-jam Baronda para sa isa ka posisyon nga pang-nasyunal nga lebel. Agud mas masami siya sa ibabaw kag mas mangin pamilyar siya sa hulag kag lihok sa nasyunal.
Nakahibalo man kita nga ulihi na nga termino ini ni Cong. Baronda. Kinahanglan nga may yara sang magatal-os gikan sa ila linyada.
Tuyo sang bisan sin-o man nga yara sa pwesto nga may magapadayon sa ila ginsuguran, ilabi na kon sila ang nagahana na nga magabiya sa sina nga katungdanan.
Tion na ni Mabilog nga maghumlad sang iya pakpak nga madugay nga ginkipot sang panahon. Kinahanglan na ini nga maunyat agud makampay para sa malawig nga pagpanglatas sa wayang sang panghimanwa.
Gikan sa madulom nga pahina sang iya kabuhi padulong sa masanag nga paglaum kag bag-o nga palaabuton, magadihon siya sang bag-o nga kasaysayan para sa syudad sang Iloilo.
Naglipas na ang istorya sang iya inagyan. Nabaton na niya ang iya nangin kapalaran. May mga bagay man siya nga ginhinulsulan. May madamo na siya nga natun-an. Ang tanan nga ini mangin armas niya sa pag-atubang sa bag-o nga katungdanan kag sa poder nga itugyan liwat sa iya sang mga pumuluyo sa syudad sang Iloilo. (bertladera@gmail.com/PN)
