GINAKADLAWAN sang Pilipino ang mga senador nga nagapaningkoy sa ila panindugan kag nahadlok sa harog sa ila sang Malakanyang.
Lantawa ang tagsa nila ka mga post nga nagapahayag, nagapaathag, kag luyag magkuha sang simpatiya sang pumuluyo, kadamuan sa ila ang gina-ulan sang harakhak, makita ang reaksyon nga nagakaadlaw sa ila, wala sila ginaseryoso kag daw kaangay nga ginayaguta sang mga tawo.
Bisan ano pa ka panami-nami sang rason, palusot kag paathag, klaro para sa tanan nga naghuyang sila sa ila panindugan sa kahadlok nga mangin kaangay sila kay Senador Jinggoy Estrada nga nauna na nga nagpanimuron sa karsel.
Nangin mahapos para sa administrasyon nga puksion si Estrada tungod nahuman na sa pinsar sang Pilipino nga mahuyang siya ilabi na nga madamo na siya sang kaso nga naatubang kaangay sa gina-akusar sa iya nga graft kag plunder.
Indi mabudlay para sa administrasyon nga unahon siya tungod napatudok na sa pinsar sang tawo nga wala siya sang kadudlaan bisan pa nga ang mga akusasyon sa iya sadto iya nalutsan kag matinlo siya nga nagatindog nga wala sang nahimo nga kasal-anan. Huo, may yara pa sang iban nga kaso nga ginapangtubang sadto nga tubtob subong wala pa maklaruhan. Magluwas ina sa pinakaulihi nga iya ginapangatubang.
Apang, kon lantawon, mas maisog si Estrada sa pag-atubang sa akusasyon, nagasunod siya sa legal nga proseso kag wala nagapatay-og sa pamahog sa iya sang administrasyon.
Mas maayo pa siya nga indi abogado kag wala nagabantala sang iya pagkarelihiyoso, maisog nga nag-atubang sa akusasyon, ginsumiter ang kaugalingon sa legal nga sistema kag kasuguan, nga ang taming lamang amo ang kamatuoran kag pagpati nga wala siya sang nahimo nga kasal-anan.
Indi pareho kanday Senador Chiz Escudero nga una nga naglupok ang ngalan, nagpanagang tungod nasambitan na kaupod sa ngalan ni former House Speaker Martin Romualdez nga amo ang dapat sukton sa flood control scandal.
Madugay nga paayon, madugay nga pahog, kag sang nakita nga si Estrada ang nabuslog na sa karsel, kag indi malayo nga isunod na sila, hinali nga nagkambyo ang timplada. Naglisu para indi makasuhan. Nagsubahar agud nga indi pag-idasuk sa karsel.
Amo man si Senator Joel Villanueva, ang ngalan niya una man sadto nga nasambitan, sa imbukada, sa wala pa naglawig ang imbistigasyon, puro panginwala, tuman ka tinlo, apang nagsubahar sang ginpahog nga kasuhan, nag-ugday ang kaisog, naminsar sing malawig, kag mas ginpili ang magsunod kaysa sa karsel magsulod.
Kon nagapati sila nga wala sila sang kasal-anan, kon wala sila sang nahimo nga kalautan, ngaa naghuyang ang ila panindugan?
Wala kita nagasiling nga may salabton gid sila, apang kon may naga-akusar, ang tanan nga remedyo legal yara sa ila agud batakon ang ila dungog, ilabi na kon wala sila sang may nahimo nga sayop, kon matinlo ang ila konsensya.
Ang tawo nga nagatindog sa kamatuoran indi dapat maningkoy sa pwersa, sa pahog, sa gahum, sang luyag maglupig sa ila.
Dapat ipanindugan ang kamatuoran, dapat pangapinan ang interes sang pumuluyo, dapat ipakita ang kaisog nga mag-away sa mga tuyo magbali sa kasuguan, sa magpatu-pato sang wala sing kamatuoran.
Paano ang ordinaryo nga pumuluyo kon ang ila ginatangla, ang ila ginasaligan, ang ila tagpangapin, nangin tuman ka huyang kag nagpalupig sa gahum sang kalautan.
Kon mahimo nila ini sa mga senador, paano ang ordinaryo nga tawo nga wala sang kwarta, wala sang poder, wala sang impluwensya?
Sin-o pa ang manindugan para sa kamauoran, para sa pumuluyo, kon ang ila ginasaligan una pa nga naningkoy tungod sa kahadlok?
Kon may nahimuan ka nga sala, ilabi na kon mapamatud-an, magapanabat ka man sa gihapon bisan pa nga wala ka na sa posisyon, kon lain naman nga katungdanan ang ginapangalagaran, tungod ang salabton sa sala nga nahimo wala naga-untat kon wala na sa posisyon ang nakakomiter sini.
Sa subong, daw nagakanugon kita sa ila tungod nangin mahuyang sila nga sahi sang mga senador. Apang, indi pa kita kapakot kon ano ang nagahampang sa ila paminsaron sa subong. Ayhan nagapaayon agud indi maipit agud nga makapadayo sa pagsaot sa tukar sang Malakanyang? Ayhan may ginaplano nga wala kita kahibalo nga mangin paborable naman sa Pilipino kag indi paborable sa gin-updan nga grupo.
Indi kita makapakot sa dalagan sang sitwasyon. May nagatayming. May nagahulag sang istratehiko, may nagabasa sa dalagan sang tyempo.
Ayhan, tungod sa kahadlok nga mapriso gani mas ginpili nga maglukso sa kudal sang nagapahog sa ila apang sap ag-abot sang panahon basi ila naman tutdan ang nagapahog agud nga mahilway sa pagharog.
Bisan pa nga nagahaksanay kag nagabun-anay sang ila likod, para sa iban balewala ina basta indi lang pag-isulod sa prisuhan. (bertladera@gmail.com/PN)
