NAKATUTOK ang atensyon sang mayoriya sang mga Pilipino sa pagsugod kag pagpadayon sang impeachment trial sa senado.
Sa akon nga paglantaw, wala man sang bag-o nga ebidensya tungod lunsay nahibaluan na ini sang publiko kag mas una na nga nakahimo sang konklusyon ang mga pumuluyo nga nakasaksi sa mga hitabu sadto.
Indi naman mapapati ang mga tawo kon ano ang dapat nga mangin naratibo sa isa ka hitabu tungod sila mismo ang nakabati kag nakakita.
Nangin palaagyan lang ang impeachment court agud mangin pormal ang pagtalakay sa mga ginahaboy nga isyu batok kay Vice President Sara Duterte. Ang tanan nga isyu kag sitwasyon sadto nasabat na niya, may mga pahayag kag paathag na siya, apang wala ginabaton kag ginagamit nga armas sang iya mga kritiko agud nga padutlan siya sang kaso.
Bisan ano pa ka patindog sang testigo nga kon kanday sin-o kag gikan kon sa diin, ang tawo mismo testigo sa natabu tungod sila ang nakakita kag nakabati. Indi na sila matudluan kag indi na matunga-tungahan ang ila pinsar agud patihan ang naratibo sang mga naga-akusar sa iya.
Pinasahi lang ang impeachment trial tungod nga ang mga kongresista nga luyag magtum-ok sa bise presidente kabus sa ikasarang kag mas hangkilan pa sa ila ang indi mga kongresista nga abogado sa pagtalakay sang kaso kag pagduso sang ila punto.
Bagay lang sa mga kongresista ang magbinalaybay kag magbulak-bulak sang sugilanon nga daw nagapasakop sa mga paindis-indis sa entablado sa panahon sang university week.
Nangin higayon ang impeachment trial agud nga makapasundayag ang mga hangkilan nga mga abogado nga yara lang sa panghigaron sang mga probinsya. Nahatagan sila sang higayon nga makilala kag mapakita ang ila abilidad sa pagpanabang. Bisan pa ang iban sa ila kilala na, apang ang pagtindog sa impeachment court nga ginatutukan sang madamo nga camera kag ginalantaw sang minilyon ka mga Pilipino, ang tuhay nga eksperyensya kag balatyagon para sa ila.
Liwat man nga napukaw ang interes sang madamo nga mga Pilipino sa pagpanabang, kag nagatuon sa aktwal nga kombate sang mga abogado, kon ano ang ila diskarte sa pagpangapin kag pagdusdos sa kaso, kag nagahatag sang interes sa iban nga magadayon sa pagtuon sang abogasiya.
Manami pamatian ang mga diskusyon, ang argumento kag kontra argumento, apang kahibalo naman kita nga ini tanan para lang nga mahaylo ang panan-awan kag panindugang sang nagapanilag nga pumuluyo.
Kahibalo man ang tanan nga bisan daw kaangay sa korte ang dalagan sang pagtalakay sang impeachment court apang ang magaboto sini sa conviction kag acquittal mga senador nga kadamuan sa ila wala sang legal background, indi masyado makahangop sa deliberasyon, kag ang iban sa ila nakahimo na sang desisyon antes pa man nagsugod ang paghiwat sang impeachment trial.
Paano makahimo sang angay nga desisyon kon sa panugod pa lang may yara na sang konklusyon? Kon nangin kritiko na sadto pa? Kon ang handom amo nga kakason sa pwesto ang akusado?
Paano makahimo sang angay nga desisyon kon kabus ang ihibalo sa paggamit sang timbangan sang katarungan? Paano mangin patas ang desisyon kon indi nila maapresyar ang diskurso sa legalidad, sang mga terminolohiya, kag mga angay nga kuhaon nga punto ukon pagpahigad sa mga argumento nga wala sang labot sa diskurso?
Wala man naton ginapangunahan, daku ang aton pagtahod sa mga senador, kabay nga panason nila sa aton paminsaron ang mga posibilidad nga ila himuon. Kabay nga manindugan sila sa kamatuoran.
Tandaan lang naton nga pagkatapos sang natabu sadto, suno sa ginpakita nga video sang prosekusyon nga kuno pagpamahog sang bise presidente, wala natay-og ang iya kredibilidad. Pamatuod diri ang padayon nga pagsaka sang iya trust rating. sa sina pa lang nga punto, maathag nga mas nahangpan sang tawo nga ang alegasyon batok sa iya wala sang iban nga intensyon kundi pamulitika.
Kag kon balikdon naton ang mga kongresista nga nagapanguna sa pag-akusar sa bise presidente, indi man kita kumbinsido nga lubos nga matinlo ang ila mga kamot, magluwas sa iban nga wala pa namantsahan.
Kahibalo man kita nga may mga kongresista nga luyag lang magpasundayag agud makabulig sa ila kandidatura sa masunod nga eleksyon.
Ginalingaw lang kita sa sini nga pasundayag. Kabay nga indi malipatan nga mas may mabug-at nga dapat talakayon kag ini amo ang tuhoy sa flood control scandal. Pasalamat lang kita kon nagalikaw ang bagyo, indi pa makaykayan ang kapaltahan kag kapaslawan sang gobyerno. Apang, ang madamo nga may salabton dapat nga sukton kag pasabton. (bertladera@gmail.com/PN)
