DUGAY man nga nakaupod naton diri sa aton kolum si Abyan Pedro. Galingin kuno ang iya ulo sa panugyan ni Senador Robin Padilla nga dapat “Indi One-sided” ang Prosecution batok kay VP Sara Duterte.
“Indi ako ka-intiendi sa sining panugyan ni Senador Bad Boy!” siling gani ni Pedro.
“Ngaa, haw? Ano ang indi mo naintiendihan kag ano gid ang dapat matabo? Daw kaagi ka man kaso sang pagkadula sang imo karbaw. Ano ang natabo didto nga maintiendihan mo kag ma-kumpormihan mo, haw?”
Siling niya nga nakita gid niya nga madasig ginaguyod sang isa ka tawo ang iya karbaw palayo tabuk sa suba nga wala na ugaling niya naabtan.
“Tapos?” “Gin-akusar ko siya. Kilala ko pa ang wala huya!” “Tapos?” “Ginsaysay ko sa hwes ang matuod nga natabo.Testigo ko pa gani si Pareng Mokong.”
“Ano naman ang aksyon sang hwes?” “Ginpamatian sang hwes ang akon pagpamatuod sa natabo. Todo man ugaling ang pagbinutig kag pagpangapin sang kawatan. Galalaway gid siya sa iya pagbinutig. Kuno didto siya sa pihak nga baryo nga gapamilasyon sang matabo ato, samtang nakita ko gid nga ginaguyod niya ang akon karbaw kag nahigot na sa tupad balay niya.”
“Basi ginbuligan mo pa siya sa pagpangapin sa iya kaso, nga indi ka aware, katulad sang panugyan ni Senador Binoy nga indi ka dapat one-sided? Katulad abe sang paghatag sang pangduha-duha sa imo mismo panestigo?”
“Aba wala! Tinuod gid ang akon. Kag ngaa pangapinan ko siya? Agud ipapierde ang akon kaso sa desisyon sang hwes, samtang gasugid ako sing matuod kag siya gahimo-himo lang sang istorya? Nevahhh!!!”
“Tapos?” “Ginpatihan sang hwes ang akon panestigo kag ginmanduan ang kawatan nga bayaran ang bili sang akon karbaw kag pagbayad pa niya sing dugang nga danyos.”
“Sa pagdaug sang imo kaso, makasiling ka bala nga ikaw gid ang nagpadaug sang imo kaso?”
“Indi ako hwes, a. Hwes lang ang makapamatbat kon sin-o ang padag-on sa amon. Kag ako gid, kay na-apreciar sang hwes nga nagasugid ako sing matuod kag gabinutig lang ang wala sing huya. Gusto ko pa tani dugangan sang demonyo ang iya ibayad nga danyos, pero ginpasugtan ko na lang ang luyag sang hwes.”
“Okey lang sa imo?” “Huo, okey lang kay gina-respeto ko ang ‘fair and just’ nga desisyon sang hwes.”
“In other words, sa imo kaso, ang obligasyon mo ang magsugid lang sing matuod sa imo bahin, samtang pilit nga ginalubag sang kawatan ang imo panaysayon, kag lubos nga itugyan sa hwes kon ano ang iya paghusgar sa iya pagbaki-baki sang inyo mga panaysayon.”
Amo gid man ina ang pagsulundan sa pagpasaka sang akusasyon sa husgado sa idalom sang aton Konstitusyon kag sang aton mga kasuguan.
“Ti, patihan mo pa si Bad Boy nga dapat ‘Indi One-sided’ ang Prosecution?”
“Indi na, oy! Upod ako sa obserbasyon ni Press Secretary Claire Castro nga makatilingala ining panugyan ni Senador Robin Padilla. Kon matuod, ti ano lang ang rolyo sang Depensa, naham-ot nga pamangkot gani ni Press Secretary samtang gina-interbyu.”
Sa matuod, ang Hustisya kinahanglan naton tanan agud mapangapinan ang aton mga kinamatarong sa aton Demokrasyahanon nga sosyedad.
Sin-o ugaling ang magpatuman sining Hustisya nga luyag naton maagom nga mabaton sang aton konsyensya?
Sorry, Mr. Bad Boy, pero indi makapatuman sang Hustisya ang Prosecution lang ukon ang Depensa lang, samtang kinahanglan naton ang mga ini agud mapalutaw ang kamatuoran kag ang matarong sa pagbaki-baki sang hwes sang ila mga panestigo. Ang hwes lang, indeed, ang makahimo sini sa iya “fair and just” nga desisyon!
May suspetso gani ang iban nga ginagamit lang si Senador Bad Boy sang iya mga “mentor” agud mang-distract sa Impeachment Trial sa iya mga panugdaon diri.
Ngaa? Agud ma-delay kag mag-igud ang Impeachment Trial kag mahimo lang ini nga kaladlawan, nga sa ila pagpati basi makabulig pa ini sa peke nga kawsa, sunu gani kay Pedro, ni VP Sara. Indi ayhan?
Kwidaw ugaling, kay kon pasugtan ta nga mag-igud ang Impeachment Trial sa pag-“play dumb” ni Senador Padilla kag sang iya mga kaugyon, indi lang mangin kaladlawan ang Trial kundi basi mapikon na ang mga pumuluyo sa ila pagkataka kag mag-alsa na gid sa dalanon, kag basi indi na naton mapunggan ang matabo nga kinagamo. Gani, kwidaw gid nga himuon ta lang kaladlawan ang Impeachment Trial batok sa sining mga akusasyon sang seryoso nga “misconduct” ni VP Sara./PN
