NA-FILE na sang House of Representatives (HoR) ang Articles of Impeachment batok kay VP Sara sadtong Pebrero 5.
Ginahulat na lang nga ma-constitute ang Senado bilang Impeachment Court, agud maaktuhan na ang akusasyon sang HoR batok kay VP Sara Duterte.
Mga 215 sang 306 ka myembro sang HoR ang nakapirma diri, nga sobra-sobra sa kinahanglan nga pirma (1/3 sang HoR members) agud maduso ining AOI kag mapasaka na ini sa Senado acting bilang Impeachment Court. May nagpaapas pa gani sang 25 ka dugang nga mga pirma.
Kon madutlan diri sa VP Sara ma-disqualify ini siya sa pwesto nga Bise Presidente kag indi na liwat makasulod sa government service tubtub san-o (perpetually).
Nagagwa ugaling subong nga indi pa anay maaktuhan sang Senado ang Impeachment charges batok kay VP Sara.
Ina tungod ubol na sa panahon nga maaaktuhan ini sa plenary session sang Senado nga naka-recess sugod Pebrero 7 tubtub Hunyo 2 kag ugaling mag-resume sang ila trabaho sa 20th Congress.
Kon dapat hiwaton inang Senate Trial kay VP Sara “forthwith”, sunu sa Constitution, indi buot silingon sini nga hiwaton gid ini dayon kundi sa sulod sang “reasonable time”, nga ginaugyunan man sang mga legal luminaries kag mga myembro anay sang 1987 Constitutional Convention, kag bisan sang political opposition.
Luas nga natalana ang recess sang Senado sugod sadtong Pebrero 7, indi pa mapasaka ang AOI sa Senate plenary tungod dapat pa ma-verify kag tun–an ang validity sini sa sulod sang at least 10 ka adlaw sang upisina sang Senate Secretary. Kinahanglan man ma-tun-an ining AOI sang kampo ni VP Sara.
Pila man ka myembro sang Senado ang nagapadalagan para reelection nga ang pangampanya natalana na sa Pebrero 11, samtang magahulat man sa kon ano ang matabo sa pagkatapos sang ila termino sa Hunyo 30.
Gani, nahisugtan nga ang Senate Trial hiwaton na lang sa pagbalik nila pagkatapos sang Hunyo 2. Prefer ni Senate President Chiz Escudero nga hiwaton na lang ini sa Hulyo 21 pagkatapos sang SONA ni Presidente Marcos Jr.
***
Sa aton 1987 Constitution sa idalom sang Article XI, Section 2, ang masunod pwede ma-impeach: President, Vice President, Myembro sang Korte Suprema, Myembro sang Constitutional Commissions (Comelec, Civil Service Commission, kag Commission on Audit), kag Ombudsman.
Grounds for Impeachment: Culpable Violation of the Constitution, Treason, Bribery, Graft and Corruption, Other High Crimes, kag Betrayal of Public Trust.
Si VP Sara gin-impeach sang HoR for “violation of the Constitution, betrayal of public trust, graft and corruption, and other high crimes”.
***
Wala sing kapareho ining si anay Presidente Rodrigo Duterte!
Wala ginpaabot sang tanan ang ginsiling niya sadtong gina-endorso niya ang iya siyam (9) nga kandidato sa pagka-senador sa political rally sang PDP-Laban sa Manila sang Pebrero 13.
Ginsiling niya nga kinahanglan may mapatay sa mga kontra nila nga mga kandidato agud kon wala na sila masal-utan ini sang iya mga kandidato kag magdaug pa.
“Sa isa gid lang ka paagi,” dugang gani niya, “Kag ina sa paggamit sang bomba, kasubong sang natabo sa Plaza Miranda bombing sadtong 1971 nga nagpatay sang siyam ka tawo, nga anom sina sa ila mga incumbent kag kandidato sa pagka-senador.”
Gin-mensyonar niya nga dapat may 15 ka mga kandidato sa pagka-senador nga kinahanglan mapatay. Wala ugaling niya ginhingadlan. Laban-laban lakip ini sila sa 12 ka kandidato ni PBBM upod sa tatlo pa ka mga kandidato.
Si-o ayhan ining tatlo pa? Isa sa ila seguro si anay COA chairperson HEIDI MENDOZA. Nangin whistleblower nga testigo ini si Mendoza sa committee hearing sang Kongreso angot sa gina-alegar nga anomalous nga confidential fund ni VP Sara Duterte.
Ang duha pa seguro amo sanday former Bayan Muna ACT Teachers partylist REP. FRANCE CASTRO kag GABRIELA REP. ARLENE BROSAS nga daw mapatay gid sing waswas kay ex-president Rodrigo Duterte kag VP Sara.
Indi seguro lakip dira sanday former SEN. KIKO PANGILINAN (Liberal Party), nga kilala sa iya kasuguan nga nagabulig sa mga mangunguma kag anay SEN. BAM AQUINO (Katipunan) sa iya kasuguan nga nagabulig sa mga small businessmen.
***
Galahog lang ayhan si Digong sadtong iya panugyan nga kinahanglan may mapatay nga 15 ka kandidato nga kontra sang iya 9 ka kandidato?
Matandaan pa sang mga pumuluyo ang pagkapatay sang madamo sa idalom sang War on Drugs ni Digong. Sadto ginabalik-balik gid niya ang pamahog nga “I’ll kill you!!!” Kag indi ato lango-lango lang. Sobra 10,000 gid ang napatay nga pushers kag druglords sunu sa report sang kapulisan, samtang, sunu sa mga human rights advocates, mga 30,000 gid ang napatay.
Tungod sini, basi indi lang lango-lango ining pamahog ni Digong batok sa 15 ka kandidato.
Well, we can be wrong? Pero, “Better safe than Sorry”. So, ginapanugyan naton sa mga kasumpong nga mga kandidato sa pagka-senador nga mag-amlig gid kay basi wala galahog lang si Digong./PN
