SAMTANG ginabaisan pa kon san-o gid hiwaton ang Impeachment Trial sa kaso ni VP Sara Duterte, may mga haka-haka na kon ano gid ang mangin kapalaran sini sa Senate Impeachment Court nga pangunahan sang Chief Justice sang Supreme Court bilang presiding judge upod ang kabug-usan sang 24 ka mga senador.
Ma-convict ukon ma-acquit bala ini? Kag, sa ano nga klase sang panindugan sang mga senador nga malab-ut nila ang ila verdict, conviction man ukon acquittal?
Madepende bala ini sa merito gid sang mga ebidensya kag mga testigo. Ukon sa partisan politics kag selfish interests sang mga senador?
***
By the way, indi pa mahibal-an kon san-o gid hiwaton ang Impeachment Trial. Kuno sang nagligad pa nga Hunyo 2. Sa Hunyo 11 naman kuno. Por diyos por santo, “San-o gid?” napamangkot gani sang naaburido na nga ML Partylist Rep. Leila de Lima.
***
Gin-impeach si VP Sara sang 240 sang 306 nga myembro sang Kamara sadtong Pebrero 5, 2025. Ang aton 1987 Constitution ga-require lang sang one-third (1/3), ukon 102, nga boto agud ma-impeach sang Kamara ang isa ka opisyal sang gobyerno nga ginapangunahan dira sang Presidente kag Bise Presidente.
Agud awayon ini sa boto sang mga botante, ginkampanyahan gid sang maki-Duterte nga i-boycott ang pagboto sa mga pro-impeachment nga mga kongresista sadtong 2025 midterm elections.
Unfortunately, daku gid nga majority sang mga pro-impeachment ang nagdalaug sangsa mga anti-impeachment, nga gapakita sang ila pagsugot sa Impeachment Trial.
Gin-describe ining pagdaug sang mga pro-impeachment ni Manila 3rd Ditrict Rep. Joel Chua nga isa ka “swashbuckling election victory”.
Si Chua ang nanguna sa pagduso sang mga akusasyon batok kay VP Sara sa Quad Committee on Corruption and Accountability, nga, tungod sini, galaum siya nga sakdagon gid sing lubos sang Senado ang panumbungon sang 11 ka myembro sang House Prosecution Panel.
Ugaling lang kay daw lain ang resulta sang botohay para sa 12 ka mga kandidato sa pagka-senador sang 2025 midterm elections, nga amo ang mahusgar sang kapalaran sang kaso ni VP Sara upod sa 12 nga nabilin pa sa Senado.
Nagpakita sang pwersa diri ang mga anti-impeachment sa sinang eleksyon sa pagdaug sang lima ka maki-Duterte nga mga kandidato – sanday Go, Bato kag Marcoleta sang Duterte10 kag ang duha nga laban-laban maki-Duterte bisan indi kaupod sa Duterte10.
Ining duha amo sanday Senator-elect Villar nga nagdoble-kabe sa Alyansa ni PBBM kag sa Duterte10, kag ang kuno independent candidate nga si reelectionist Senator Imee Marcos nga sa hulag kag mga deklarasyon maki-Duterte gid.
May panghulag man gani kontra impeachment halin sa mga (daw lang) maki-Alyansa man nga mga senador nga ang termino tubtub pa 2028, katulad ni Senator Nancy Binay kag ni Senator Jinggoy Estrada. Yara man dira si Senator Robin Padilla.
In fact, kon husto ang aton pagpati, isa na gid lang ang kulang agud maka-9 ka boto sila agud ma-frustrate ang manug-convict nga 2/3, ukon 16, nga boto.
Whatever, dapat hiwaton gid sang Senado ang Impeachment Trial, bisan na lang sa pag-respeto sa daku nga boto sang Kamara sa pag-impeach kay VP Sara – 240 sang 306 nga myembro sang Kamara. Kag, syempre agud man mapatihan ang reputasyon sang Senado nga independent-minded ini.
***
Pero, maboto gid ayhan ang mga senador sandig sa merito sang mga ebidensya kag mga testigo sa ila desisyon sa Impeachment Trial?
Base sa resulta sang 2025 midterm election para senador nga naghatag sang dugang nga pwersa sa kontra impeachment, basi indi na nila mahimo ina.
In other words, posible nga ang desisyon sang mga senador may lamod na sang survival politics kag maboto na lang ang kada isa sunu sa ila selfish interest.
Nonetheless, bisan ano pa ang boto sang aton mga senador, segurado nga pabudlayon gid sang House Prosecution si VP Sara sa pagsabat sang panumbungon nila sa iya sa Impeachment Trial.
Kag basi mag-retreat na lang si VP Sara sa tunga-tunga sini katulad sang natabo kay anay Presidente Estrada, kag mag-hope na lang for the best. Ukon atubangon gid niya ang Impeachment Trial sa iya pagpati kag sang iya legal team nga malutsan pa niya ang mga akusasyon batok sa iya./PN
