MAKATILINGALA ang mga pahayag. Kabudlay tunlon nga indi pagligun-ligunon ang mga pahayag gikan sa mga ahensya sang gobyerno nga may katungdanan nga tinluad ang aton komunidad batok sa makahalalit nga ilegal nga druga.
Ginapabugal sang Philippine Drug Enforcement Agency nga drug-cleared na ang 96.5% sang mga barangay sa Western Visayas.
Nagakahulugan nga 1,963 sa kabug-usan nga 3,389 ka mga barangay ang gindeklarar nga drug-free.
Ginapaidalom pa sa deliberasyon ang 119 ka barangay ukon 3.51 percent.
Sa probinsya sang Iloilo, may anum pa ka barangay nga drug-affected ukon 99.59 percent na ang drug-cleared.
Ang syudad sang Iloilo may 83 pa ka drug-affected barangays, pinakadamo sa bug-os nga rehiyon.
May 11 ka mga natumod nga drug personalities nga liwat nga nagtuhaw sa mga barangay sa Western Visayas.
Makatilingala tungod nga asud-asod ang operasyon sang kapulisan sa probinsya kag indi lang anum ka barangay ang may nadakpan nga nagaduso sang ilegal nga druga.
Ayhan, para lang may matinlo nga record? Ayhan para lang may ipresentar nga hinimuan? Ayhan para magpati ang tawo nga nagatrabaho ang ahensya?
Wala kita nahikay ukon nagapakamalaut. Luyag lang naton mahibaluan ang matuod bangud wala nagasantu ang ginasugid sang mga datus sa nagakatabu sa aktwal nga sitwasyon.
Sa bahin sang syudad sang Iloilo, 83 pa ka barangay ang drug-affected. Maathag man bangud sa adlaw kag gab-i nga operasyon, asud-asod kag kadalagku pa sang mga marekobe. Daku sa balor, bug-at sa gramo.
Ano ang koordinasyon nga ginahimo sang PDEA sa Iloilo City Government? Ano ang ila commitment para matinluan ang kabarangayan sa halit sang ilegal nga druga?
Sadtong Hunyo, ang Iloilo City Police Office (ICPO) nakakumpiskar sang 12.8 million pesos nga balor sang shabu kag nakatikma sang 91 ka drug suspects.
Ang PNP nagasugid sang ila nadakpan. Ang PDEA nagasugid sang ila natinluan. Ang pumuluyo nagakalingaw sa wawaw kag drama sa Facebook sang mga madakpan.
Apang, pila na ka tuig ang kampanya batok sa ilegal nga druga, apang padayon ang pagbaligyaanay. Ang nadakpan kag napriso sadto kon makagwa nagabalik sa ila lihok, liwat nga nagaduso sang ilegal nga druga. Wala naganuto, wala sang leksyon, wala sang direksyon sa kabuhi.
Paggwa nila, gutom kag wala sang oportunidad nga makapangabuhi. Katingala lang ang mabatian sa kasilingan nga nakagwa na gali sa prisuhan.
Kon panilhig, panglagas, kag pabugal sang accomplishment lang ang aton sistema, indi masolbar ang problema.
Dapat sinsero ang mga ahensya sang gobyerno sa pagtapna sini mismo sa kon diin ini nagahalin. Dapat matumod ang source, ang ginahalinan, ang laboratoryo nga ginatimplahan.
Dapat id-iron ang mga kemikal nga nagasulod sa aton, ilabi na kon sangkap ini sa paghimo sang ilegal nga druga.
Wala kamo ginakapoy sang lagas? Para may ipabugal kag para sa promotion?
Kon wala dakop, wala accomplishment, wala man promotion sa rangko?
Kon ginapugaan sang impormasyon ang madakpan, kon nagatuad sila kon diin nagakuha, kon sin-o ang mga persona, ngaa asta subong indi matultulan? Ngaa indi matumod? Ano gid manbala ang matuod?
Madugay na nga ginasiling nga dapat hugot ang pagbantay sa mga pantalan nga amo ang mayor kag masami nga alagyan sang ilegal nga druga.
Apang, ngaa daw kabudlay magbakal sang x-ray machine? Ngaa wala sang permanente nga K-9? Ngaa pakulahaw ang mga solusyon nga ginapatuhoy batok sa ilegal nga druga?
Seryoso gid man kita sa aton kampanya batok sa ilegal nga druga? Ukon komporme na lang kita bangud sagunson man ang dakpanay, mabakas man ang kapulisan.
Apang ang aton tuyo indi lang dakpanay, kundi dapat mahilway kita sa dalit sang ilegal nga druga. Dapat mapapas ang source kag madakpan ang ila mga galamay.
Wala kita nahikay sa ikasarang sang aton mga ahensya sang gobyerno. Apang, nagapati kita nga may mahimo pa sila labaw sa ila ginahimo sa karon. May ikasarang nga gastuhan ang anti-illegal drugs campaign paagi sa pagbakal sang mga kagamitan nga magatapna sa pagsulod sang ilegal nga druga.
Dapat tun-an ang mga polisa nga indi epektibo, ang mga sistema nga wala nagahatag sang resulta.
Ayhan may mga nagamaskara nga mga prominente nga tawo, ukon negosyante, ukon mga yara sa alta-sosyudad nga mabudlay bungguon rason nga ginalikawan nga masakpan sang radar sang mga manugdakop?
Makaluluoy lang ang mga gagmay nga isda nga ginalumoy sang mga bulgan.
Nakatuon ang mga drug personalities kon paano hampangan ang kasuguan nga sa makaisa nagdasuk sa ila sa karsel. Nakita na nila ang kahuyang sang sistema kag ang libagon nga polisa.
Sa sulod sang prisuhan, mas nagpag-on ang ila kaantanan sa iban nga kaangay nila. Mas nag-alam sila sa dikta sang panaho kag sitwasyon.
Ayhan sila na ang naga-uyat sang higot agud ang sistema sa ila palad magasaot? Ano gid man ang matuod? (bertladera@gmail.com/PN)
