Ni CYRUS M. GARDE
Syudad sang BACOLOD – Patay na sang nasapwan ang 40-anyos nga bana sa sulod sang kampo sang tubo sa Purok Arceo, Brgy. Alegria sa banwa sang Murcia, Negros Occidental sang Domingo sang aga.
Nakita ang bangkay ni Al Quin Saldo, residente sang Brgy. Cabatanga, Syudad sang Talisay, nga nakabaklid, may gapos sa likod, gintabonan ang mata, may busal ang baba, kag may igu sang luthang sa iya wala nga dulonggan nga naglapos sa pihak.
Wala pa man nakita ang ginsakyan sini nga motorsiklo.
Sunu sa report, si Saldo nagkadto lang sa Murcia agud magbisita sa iya napatay nga himata.
Nahibaluan pa nga ginhambalan sini ang iya asawa nga mauna lang sia kadto didto kag masunod lang ang asawa sa dason nga adlaw.
Sunu naman sa asawa sini, ulihi niya nga nakontak ang iya bana temprano pa sadtong Sabado.
Apang sang kaagahon na sang Domingo, wala na ini nagsabat sa iya mga text messages kag ginpaka-maayo sini nga tawgan apang unattended na ang iya cell phone.
Rason nga nagdesisyon ang asawa nga magsunod pagkaaga sang Domingo, apang daku ang kakibot sini sang mahibaluan nga patay na ang iya bana.
Samtang ginasulat ini nga balita, ang Murcia PNP wala pa gid sang ihibalo kon ngaa ginpatay ang biktima kag sin-o ang nagpatay diri samtang ginapatigayon pa ang imbestigasyon./H
