Bulig sa trapiko kag sa mga drayber sang trisikad

CONGRATULATIONS sa kay Miss Iloilo 2020 Karen Laurie Mendoza sang Iloilo City sa pagsulod niya sa final list sang 2020 Binibining Pilipinas candidates.

Sa matandaan naton, amo pa lang ini nga kahigayunan nga ang Iloilo Dinagyang nakapadala sang kandidata sa national beauty pageant, katulad sang Bb. Pilipinas, Miss Universe-Philippines, Miss World-Philppines, kag iban pa.

Tani amo man ina ang madangtan sang iban ta nga Miss Iloilo 2020 nga sanday Miss Iloilo-Universe 2020 Rabiya Occeña Mateo, kag Miss Iloilo-World 2020 Ann Roxal Dedel Palmares.

Congratulations man sa mga nakasulod sa 40 ka finalists sang 2020 Bb. Pilipinas nga sanday Ana Thea Cenarsa sang Pototan, Iloilo kag Vickie Rushton sang Negros Occidental.

Daku nga bugal naton ini nga nakasulod sila sa final list sang 2020 Bb. Pilipinas, labi na gid kon isipon naton nga ang mga Ilongga mas kilala bilang mga “beauty from within” sangsa “visual beauty” tungod sang ila kahinhin, pagka-maabiabihon, kag pagka-humilde (humble) bisan pa sa ila mga kapinasahe nga lakip na dira ang ila kaanyag.

In other words, indi ang Ilongga mahuyog mag-entra sa mga beauty contest, luas lang kon kinahanglan gid ang iya representasyon para sa kaayuhan sang ila lugar, katulad sang ginhingyo sang Iloilo Festival Foundation Inc. sa ngalan sang siyudad sang Iloilo.

Pang-charity lang ang “beauty” sang mga Ilongga, hambalon pa, sa mga fiesta bilang fiesta queen kay indi nila ugali ang magpahambog sang ila katahum.

***

Mabasa  naton ining mga Ilongga nga nagdalaug sa beauty contest, diri sa pungsod kag sa luas sa “Interesting Facts About West Visayas, Book 6” ni Atty. Rex S. Salvilla.

Nagalakip ini kanday Pura Villanueva (una nga Miss Phlippines 1907); Maria Kalaw (1931 Miss Philippines); Mercedes Montilla (1936 Miss Philippines);

Aurora Pijuan (1970 Miss International); Dolly Ascalon (1976 Bb. Pilipinas-International); Louise Vaile Aurelio (1965 Bb. Pilipinas–Universe); Geraldine Asis (1985 Bb. Pilipinas-Universe); Jennifer Barrientos (1998 Bb. Pilipinas-Universe);

Emma Ruth Yulo (1986 Queen of the Pacific); Binky Montinola (1969 Bb. Pilipinas International); Carmela Arcolas (Philipine Centennial Queen 1998); Siobhan Salvilla Cox (2004 Miss New Zealand-Philippines); kag Anjanette Agbayari (1991 Bb. Pilipinas-Univere).

***

Madugay nakalusot kami sa dyep nga ginasakyan ko sang ugto kahapon (Lunes, Marso 2) sa ginsang-an (crossing) sang Yulo-Caram streets paliku sa  Delgado Street agi sa tunga sang SM Delgado kag Marymart Mall.

Nagaigud ang lakat namon nga daw may nagabalabag sa trapiko tubtub nakaabot kami lapit sa ini nga intersection. Didto ko lang nakita nga nagasalamihay ang traffic aide sa pag-kontrol sang trapiko diri, nga nagapakita nga bag-uhan siya sa iya trabaho. Man, nagainagaway lang ang salakyan nga luyag maglusot sa pihak kag pihak nga bahin samtang sige ang iya kumpas nga indi ma-intiendihan.

Mr. Jeck Conlu, aber ibutang man dira ang traffic aide nga may eksperyensya na gawa dira sa ina nga ubra. Daw nagatuon pa lang ining traffic aide mo. I-assign anay ini siya sa tulutawhay nga crossing. Okey?

 Ini nga problema nakapatalupangod man sa akon sa sitwasyon sang madamo nga access roadways dira sa mayor nga dalan halin sa Jaro Plaza tubtub sa Calle Real.

Daw parilya (sulugbahan) ang kahimtangan, sa diin indi seguro magkulang sa napulo ang kasubong nga access roads sa pihak kag pihak nga nagaangot sa makitid man nga mayor nga dalan.

Ginpanubli pa naton ini nga problema sa panahon sang mga Espanyol, sa diin oso pa ang kalesa (karitela nga ginaguyod sang kabayo) apang sa gihapon ginapasudlan naton ini tanan sang mga salakyan pasulod sa sining mayor nga dalan.

Tungod na gani sa pagdamo sang salakyan naga-resulta ini sa pagpug-ok sang trapiko sa mayor nga dalan halin sa sining mga access roadways.

Ang aton suhestyon amo nga ang pila sining mga malip-ut nga mga dalanon dapat mga walkway, ukon lalakton, lang kag ihatag sa mga trisikad kag triskol sa luyag magsakay diri. Luas lang sa mga taksi tungod sa ila malawak nga pagka-mapuslanon sa publiko sa kon diin lang.

Exercise pa ini sa mga tawo nga wala exercise kag makabulig pa sa ila ikaayong lawas.

Kag syempre, makabulig pa ini hatag sang palangabuhian sa pigado naton nga mga utod nga drayber sang trisikad kag trisikol. (w_mateojr@yahoo.com/PN)