Ni Cyrus M. Garde
Syudad sang BACOLD – Patay ang 21-anyos nga call center agent matapos nga nakoryente samtang nagapaligo sa banyo sang ila boarding house sa Brgy. 22 diri sadtong Lunes sang gab-i.
Ginkilala sang Police Station 2 ang biktima nga si Lorna Casugod, dalaga kag tumandok sang Brgy. 2, Pontevedra, Negros Occidental.
Nasapwan si Casugod nga nagahigda sa salog sang banyo matapos ginpuersa gub-on ang na-lock nga ganhaan sang banyo.
Sunu sa pahayag sang iya mga boardmates, nabatian nila ang singgit ni Casugod kag dali-dali sila nga nagresponder apang naka-lock ang ganhaan.
Antes sini, napatay ang suga sa banyo kag ginapatihan nga ginkapkap sang biktima ang switch, apang nauyatan ang live wire nga na-angut sa amo nga switch.
Nahibaluan pa nga madamol ang ulan sadto nga tion.
Pag-abot naman sang mga pulis, gindala ang biktima sa Corazon Locsin Montelibano Memorial Regional Hospital apang gindeklarar dead-on-arrival.
Gilayon naman nga ginpahibalo ang pamilya sang biktima agud ma-autopsy ang bangkay para matumod kon may ara “foul play” sa kamatayon sini./H
