ISA SA palaligban sa karon kon paano makapangibabaw sa pagka-bise alkalde si Jeffrey Ganzon sa palaabuton nga eleksyon.
Sa subong nga resulta sang mga survey, nangin tayuyon nga ginakuritan siya sang iya kasumpong nga mas bataon, mas bag-o, kag mas nagadabdab ang ideyalismo sa pagserbisyo sa konseho sang syudad.
Mas nagakaangay nga aton sipad-siparon kon ano ang mga kabangdanan kon nga nagakawigit si Vice Mayor Jeffrey Ganzon batok sa iya hugot nga kasumpong nga si anay City Councilor Love-Love Baronda.
Diri kita magapokus sang aton diskusyon tungod sa diri nga posisyon mas mainit ang sambuwa sang duha. Maathag naman nga wala sang mapag-on nga kasumpong si Congresswoman Jam Jam Baronda kag sa pagka-alkalde madamo pa sang mga pagbag-o nga mahimo matabu samtang nagahilapit ang panahon sang kampanya.
Pila na ka beses nga nagpangibabaw si Ganzon sa pagka-bise alkalde batok sa pila ka mga naghangkat sa iya posisyon sa mga nakalipas nga mga eleksyon. Nagasandig sia sa kusog sang mga ginatawag sini nga ‘timawa’ nga amo ang tampad nga tagsakdag sang ila pamilya umpisa pa sa panahon sang iya amay nga si anay Mayor kag Senator Roding Ganzon.
Matuod, madamo sang nabuligan, madamo sang nahimuan, madamo sang nagapalangga kag nagasakdag sa iya sa tagsa ka piniliay. Napasa kag gina-agom ini nga bentaha ni Vice Mayor Jeffrey Ganzon kag pamatuod diri ang padayon nga suporta sa ila sang pumuluyo tubtob sa iya anak nga nangin konsehal man sang syudad sang Iloilo.
Apang, ngaa nagakawigit siya sa survey? Ano ang nagakatabu? Mawigit siya ayhan kag pagabuslan sang mas bataon nga nagahangkat sa iya posisyon?
Kon lantawon naton, ang mga ginakabig nga ‘timawa’ nagagamay na lang ang ila numero. Sa nakalipas nga panahon, ang iban sa ila naga-edad na, basi may nagtaliwan na, ukon basi nagsaylo na sa iban nga lugar. Sa simple nga pulong, indi na sila tuman ka damo kon ikumparar sadtong panahon sa nakalipas nga mga eleksyon.
Maathag nga ang syudad sang Iloilo may narehistro nga 319,294 ka mga botante kag kadamuan diri mga bag-uhan kag mga bataon.
Ang mga ginakabig nga ‘timawa’ lamang ang makahangop sa mga sugilanon tuhoy sa mga nahimuan sadto sang iya amay, sa mga proyekto kag programa, kag kon paano siya nagserbisyo sadto. Apang, ang subong nga mga henerasyon sang mga botante indi maka-relate sa sini nga mga sugilanon tungod nga wala pa sila sadto, wala naka-eksperyensya, kag wala nagasabor sa sini nga mga programa kag serbisyo.
May yara sang generational gap sa tunga sang kandidato kag mga botante. Ini ang dapat tun-an kag solusyunan ni Ganzon agud nga makaangot siya sa mga bataon nga mga botante.
Dapat tun-an niya ang mga bag-o nga pamaagi sa pagdul-ong sang mensahe sa sini nga sahi sang mga botante.
Sa ginasiling, “In business yesterday’s formula for success is tomorrow’s recipe for trouble.” Ang mga pamaagi nga nagpadaug sa iya sadto, basi amo man ang makahatag sa iya sang peligro kag posibilidad nga mapaslawan tungod tuhay na ang sahi sang mga botante nga iya ginadul-ungan ang mensahe nga para lang sa mga ‘timawa’.
Siling ni Charles Darwin, ““It is not the strongest of the species that survives, nor the most intelligent. It is the one that is most adaptable to change”.
Sa lakat sang pulitika sa syudad sang Iloilo, dapat tun-an kon ano, kon sin-o ukon ano nga sahi sang botante kag kon ano ang angay nga mensahe ang ipalab-ot para sa ila.
Ginatalakay ko ini indi agud pakamalauton si Ganzon kundi agud hatagan sia sang ideya kon ano ang dapat kag angay nga himuon. Dapat tun-an niya ang sitwasyon kag pamatian ang tugda sang panahon kon luyag niya nga makalagas sa iya kasumpon kag kon paano mabatak ang iya numero sa survey nga ginapatigayon sa karon.
Luyag ko lang nga mahatagan sang giya, indi lamang si Ganzon, kundi lakip ang tanan nga nagakawigit sa survey.
Makabulig man ini sa nagapanguna sa survey agud nga mas mapapag-on niya ang iya posisyon kag mas mapalayo ang distansya sa iya kasumpong.
Importante nga nagatuon kita sa sitwasyon, ginahakus naton ang mga pagbag-o, kag ginatinguhaan naton nga masabat ang ginahingyo sang sirkumstansya.
Sa panahon sang kampanya, importante ang klaro nga mensahe nga mahangpan kag makadulot sa pamisaron kag balatyagon sang mga botante.
Ang survey mangin palaagyan sa pagtukib kon sa diin ang kusog kag kon diin ang huyang. Makahatag ini sang giya kon paano imprubahon ang mga hilikuton agud nga mas makaganyat sang mas madamo nga tagsakdag. (bertladera@gmail.com/PN)
