NANGIN magansal sa social media sang damlag lang ang sugilanon tuhoy sa ginapasuni nga “spy” kag “double agent” nga amo ang nagatuga sang banggi-anay sa tunga sang mga supporter ni anay Presidente Rodrigo Duterte.
Magahod sa social media ang vlogger nga Capiznon nga si Maharlika ukon Claire Castro sa matuod nga ngalan kag may masobra 143 million views ang iya content nga “Boldyak TV” nga ang topiko amo ang pagbuyagyag sang sini nga isyu.
Madamo siya sang bansag sa babaye nga ginasiling nangin top protocol officer sa panahon ni anay Presidente Rodrigo Duterte.
Madamo sang nagapamangkot kon siya gid man ang gintumod sang mga supporter ni Digong bilang “spy” kag “double agent”.
Ginatungkad man sang mga vlogger kag netizen kon ang ini nga babaye ang tiayon sang isa sa mga eredero sang isa ka transport operator.
Una nga nagpabutyag sang kaakig ang mag-iloy nga sanday Honeylet Avanceña kag Veronica “Kitty” Duterte nga nagapasuni nga ginagamit ang anay president. Tungod sang ila pagpautwas sa social media, gilayon nga gintumod sang netizens ang asawa sang isa sa mga tag-iya sang transport company nga amo ang sentro sang ila reklamo.
Nagtuga ini sang interes sa mga nagasunod sa mga impormasyon tuhoy kay Digong kag mas nadabukan sang nangin topiko ini ni Maharlika.
Suno kay Maharlika, ang babaye nakita nga nagpabalon sang rosarito kay Duterte antes ini ginpasakay sa eroplano. Madamo sang nagapamangkot kon paano siya nakasulod sa Villamor Air Base tungod bisan mismo si VP Sara ang wala gani nakasulod.
Nagmuad ang mga pamangkot, kag isa diri ang pamangkot kon sin-o ang yara sa likod sang babaye sa iya pagpadulong The Hague kag nagapatigayon sang suporta sa mga Duterte supporters.
Kon indi maklaruhan ang ini nga pamangkot, padayon ang pagpamangkot kon may kahilabtanan ayhan ang pamilya sang transport company sa Pro-Duterte nga hulag sang babaye sa The Hague. Ginapasuni man nga may istoryahanay nga Pro-BBM nga hulag diri sa Pilipinas nga gina-angot man sa babaye kag sa pamilya sang transport company.
Madamo sang mga nagalinagabong nga mga impormasyon nga ginabuy-an si Maharlika sa iya nga vlog. Madamo ang nagasunod kag nagahulat sa masunod nga impormasyon nga iya igabuyagyag.
Tubtob subong, madamo ang nagasunod kag luyag nga maathagan sa matuod nga sitwasyon. May mga pamangkot nga posible masabat sa padayon nga pagtuad ni Maharlika.
Tungod sa sini nga kontrobersiya, nagtuga ini sang pagbahin-bahin sa mga supporter ni Duterte. May yara sang masingki magpautwas sang ila nahibaluan kon ano ang ila nahangpan sa sitwasyon, kag may yara man nga nagahipos na lang bangud kilala nila ang tagsa-tagsa kag indi nila luyag nga mahinambitan kag mangin sentro sang pagbombardiho ni Maharlika sa iya nga programa sa social media.
Nagapabilin nga malinong ang gina-atake, nagapatuto, wala sang may ginabungat, kag posible indi luyag nga makadabok sa sitwasyon.
Samtang kita nga nagalantaw sa sitwasyon, padayon nga nagahulat sa kasugpon sang sini nga teleserye sa tunga sang mga nagabanggi-anay nga mga supporter ni anay presidente Rodrigo Duterte.
Wala na kita nanibag-o sa mga banggi-anay sang mga supporter tungod sang nagligad gin-ukalan man ang natabu sa ginhiwat nga pagtililipon sa The Hague kag mismo mga vlogger nga supporter ang nagkomprontahanay sa isa ka isyu ukon akto nga nasawayan sang isa ka bahin nga ginhimo sang mga nag-organisar sang pagtililipon.
Mismo sa social media sila nagpang-itanay kag sang ulihi sa social media man nakita ang ila pag-aregluhanay agud nga matapos na ang isyu kag naklaruhan sang magtimbang nga bahin ang ila ginapangapinan nga isyu.
Apang sa bahin sang misteryoso nga babaye, tubtob karon wala pa sang klaro kon husto ang akusasyon sang netizens kag vloggers nga “spy” kag “double agent” gid man siya.
Yara sa kada isa ang higayon nga makapaathag kag pangapinan ang kaugalingon batok sa akusasyon. Indi kita makapat-ud sa karon kon ano ang kamatuoran kag kon may yara sang kabutigan sa sini nga sugilanon.
Padayon lang kita sa pagbantay sa masunod nga hugnat sang impormasyon nga igabuyagyag sang mga vlogger sa sini nga teleserye. (bertladera@gmail.com/PN)
