WALA salig si Presidente Duterte sa ikasarang sang iya anak nga si Davao City Mayor Sara Duterte-Carpio agud mangin Presidente sang pungsod.
Ginpahayag niya ini mismo sa nagalagaw nga sugilanon nga ginatulod sang pila ka kapartido nga padalaganon sa pagka-Presidente ini tal-os sa iya amay nga matapos na ang termino sa Hunyo 2022.
“Indi palanublion ang pagka-Presidente,” siling gani ni Manila City Mayor Isko Moreno.
In fact, upod lang ini sa balatyagon sang mga pumuluyo nga indi luyag himuon nga palanublion ang pinakamataas nga pwesto sa gobyerno, ukon ang pagka-Presidente, sang pungsod mismo sa pagkatapos sang termino sang amay ukon iloy nga Presidente.
Wala gani ginpahanugutan sadto ni Presidente Cory nga ipanubli ang iya pagka-Presidente sa iya anak pagkatapos sang iya termino. Wala man ini gintugot sang iban naton nga mga Presidente halin kay Roxas tubtub sa kay Gloria Macapagal-Arroyo.
***
Kon gin-aku ni President Duterte nga wala sing ikasarang agud mag-Presidente ang anak niya nga si Sara, ina tungod kilala gid niya ining iya anak nga babaye.
Hambalon pa, President Duterte knows better kon ano lang ang masarangan ni Sara. Tubtub lang seguro mangin mayor sang Davao City nga isa ka diutay nga lugar nga may diutay man nga problema.
Wala ugaling naluyagan sang mga kababaenhan sa ila advocaciya sa Women Power nga kinahanglan pa dalahigon ni Presidente Duterte ang iban nga kababaehan, samtang indi man ang tanan nga kababehan wala sing ikasarang para sa kasubong nga kabug-at nga responsibilidad.
In fact, madamo nga kababehan ang ginasaligan kag padayon nga ginasaligan sang ila mga pumuluyo sa madamo man gani nga pungsod. Kon indi presidente, prime minister, ukon ano pa dira nga titulo ang pagkilala nila sa ila lider.
Kon indi si Sara makasarang, ti siya lang kag indi ilakip pa ang iban nga babaye nga napamatud-an bisan pa gani sang mga dalagku nga pungsod nga makasarang, katulad sang United Kingdom kag iban pa, siling gani nila.
“Okey, may kahuyang ang babae, pero sa pisikal lang seguro nga ikasarang,”siling nila, “In fact, ang kinahanglan sang isa ka lider amo lang ang ikasarang sa kinaalam kag ihibalo nga pwede man matun-an kag mahibal-an sa experyensya nga wala sing kinalis sa mga lalake.”
Indi man kuno problema ang kahumok sang balatyagon sang isa ka babaye. Bentaha pa gani ini sa aton pagkilala sa babaye sa iya pagka-matatapon sa mga anak.
Indi katulad ini kay Presidente Duterte nga wala sing kaluoy sa pagsugo nga pamatyon ang mga nakasala sa pasalig nga wala sila sing salabton kay akuon niya ini tungod sa iya “immunity” sa mga akusasyon samtang Presidente.
Nagtulod ini sa pila ka kapulisan agud mangin “trigger-happy” sa diutay lang nga hulag sang mga suspetsado kag wala sing “due process” nga ginapatuman ang ila gutgut sa kay kon sin-o man nga may personal sila nga kaakig.
Indi tani dapat matabo ini sa aton Demokrasya tungod “government of laws” kita – indi “government of men” – kon diin may igwal nga kinamatarong ang tanan sa “due process” tubtub mahusgaran gid sing husto.
Remember nga bisan ang Roman Empire, nga sadto pinakagamhanan sa tanan nga pungsod, natumba tungod sa kapintas sini nga nagtulod sa mga pumuluyo sa pag-ribok kag magdaug gamit lang ang Kristohanon nga gugma kag ang kahandaan nga mapatay (martyrdom) sa hinganiban sang mapintas nga mga hangaway Romano.
In other words, indi mo madala ang mga pumuluyo sa pirme nga pamahog kag pamintas agud mapasunod sa salsalon nga kamot sang gobyerno sa luyag lang sini, kundi sa pagkilala sa ila kinamatarong sa ila makatawo nga balatyagon, kinahanglan nga hustisya, kinamatarong sa pagpanibag-o sang kabuhi, kag ang pag-ulikid sa ila kinahanglanon nga wala sing pinilian.
Kag remember nga kon may tion man nga kinahanglan ang matig-a nga kamot agud mapaluntad ang kalinong, indi ini dapat magdugay kay madale matak-an ang tawo sa madugay nga pagdula sang ila kahilwayan.
Natural sa tawo ang mabuhi nga hilway sa katalunan, sa kapatagan kag bisan sa pakig-salamuha sa kapareho. Ang madugay nga paglupig sining natural nga kinamatarong, nga natun-an ta sa kasaysayan sang kalibutan, nagabunga sing pag-ribok, nga ginahalinan sang pagkatumba sang bisan sang pinakagamhanan nga gobyerno. Dapat tandaan naton ina!/PN
