GINKAKIBOT sang siyam (9) ka milyon nga kasimanwa nga Ilonggo ni anay PNP Chief Nicolas Torre III, kag sang madamo pa nga mga pumuluyo sa pungsod ang pag-relieve ni Presidente BongBong Marcos Jr. sa iya bilang hepe sang PNP.
Ang rason amo ang pag-reshuffle, ukon pag-reassign ni Gen. Torre sang at least 29 ka PNP officers sa liwan nga assignment, nga ginpamatukan sang National Police Commission (Napolcom) sa pagmuno bilang chairman ni DILG Secretary Jonvic Remulla mismo.
Sa idalom sang principle of delegated power sa aton Demokrasya, isa ka trusted nga subordinate chief of office maka-desisyon sing iya sa iya kaugalingon nga maupangan lang kon sa pagpati sang iya superior lapaw na ini sa poder kag otoridad sang subordinate.
Naglapaw na si Gen. Torre sa iya otoridad, sunu sa Napolcom, sa pag-reshuffle, ukon pag-reassign sang natungdan nga mga PNP officers kag ginpabalik gid ang 13 sa daan nila nga mga assignment.
Apang indi mahibal-an sang Napolcom, labi na gid ni Remulla nga direkta sa bajo mando sang Presidente, kon ano ang himuon nila kay Gen. Torre. Wala man sila matudlo gid nga “sayop” sa ginhimo ni Gen. Torre nga pwede siya makasuhan bisan administrative lang.
Normal man lang ang re-assignment sang mga PNP officers agud mapaseguro ang ila kahimpit sa serbisyo kag agud malikaw sila sa corruption sa sige nga pagpakigrelasyon sa mga tawo, labi na gid ang may interes sa mahimo sang ila pwesto.
So, ano ang malain dira? Luas lang, of course, kon malisyahan sang iban kag sudlan sang politico, Katulad ni Remulla, kon si Pedro pa ang patugdaon.
***
Nadumduman seguro ni Remulla, nga political supporter ni Presidente, nga sadto ang iya kandidato para sa PNP Chief amo si LtGen. Jose Melencio Nartatez Jr., nga myembro sang Philippine Military Academy (PMA) class 1992 kag indi si Gen. Torre nga, unfortunately para sa iya, amo ang napilian ni Presidente Marcos Jr.
So, ginrekomendar na gid lang ni Remulla nga ma-relieve si Gen. Torre kag ibulos si LtGen. Nartatez.
Si Gen. Torre gradwet, on the other hand, sang Philippine National Police Academy (PNPA) sadtong 1993 kag katapo sang Tagapaglunsad Class nga, tungod sa iya madinalag-on sa pagpadakop kay anay Presidene Duterte kag Pastor Quiboloy nga wala sing natabo nga kinagamo, naghatag ini alagyan sa Presidente agud pilion siya ibulos sa nag-retiro nga PNP Chief.
Kag nangin una siya kag isahanon nga PNPA gradwet nga na-appoint nga PNP Chief!
Ambot kon paano nakumbinse ni Remulla si Presidente agud ma-relieve si Gen. Torre kag ibulos si LtGen. Nartatez.
Pero, na-relieve gid si Gen.Torre nga and relief order gnpirmahan ni Executive Secretary Lucas Bersamin sadtong Agosto 25, 2025 nga “effective immediately”.
Nonetheless, ang 18 gid ka regional PNP units nagpahayag, paagi sa mga manifesto, sang ila suporta sa sinang re-shuffling nga ginpatuman ni Gen.Torre.
Subong man ang mga pumuluyo nga nagpahayag gid sang ila pag-suporta sa programa ni Gen. Torre nga “5 Minute Quick Response” sa mga reklamo sang mga pumuluyo.
Ginhugyawan pa gani si Gen. Torre bilang “Boxing Champion” sa ila boxing match sang wala nag-ulhot nga taslawit nga meyor nga nagkita sing minilyon ka pesos, nga ang tanan nga ini iya ginpanghatag sa mga kubos. Which makes Gen.Torre nga isa ka “folk hero”!
***
Pero wala sing duga-duga nga ginbaton ni Gen. Torre ang iya Relief nga wala “bitterness”. “I am a soldier,” siling niya, “and I follow orders.”
Madamo ang nanugunan sang pagka-relieve ni Gen. Torre, labi na gid kay nangin madinalag-on ang iya pagpungko bilang PNP Chief bisan sa sulod lang sang wala pa tatlo ka bulan. Kag ang reshuffling sang mga PNP officers, nga kon natigayon, sunu sa madamo, mas nakapaayo pa tani sang pag-serbisyo sang mga pulis sa mga pumuluyo.
***
Ano ayhan ang panindugan ni Gen. Torre kon ngaa ginduso gid niya ang pag-reshuffle sang 29 ka mataas nga opisyales sang PNP?
Wala pa kita nakahibalo, pero sa aton pensar ginaseryoso gid seguro ni Gen. Torre kon ano siya ka “accountable” sa iya obligasyon, nga dapat lang, kag ang pag-reshuffle sang mga PNP officers makapabakod pa gid, kag agud indi mapaslawan, sa pagtuman sang iya obligasyon bilang PNP Chief.
Meantime, floating si Gen. Torre nga ang official retirement sini sa 2027 pa. Pwede man siya magbaton sang maluyagan niya nga pwesto nga mahatag sang Presidente kag mag-retire sa talana nga tion sa 2027. Ukon mag-advanced retirement agud magpakalinong na gid lang upod sa pamilya kag sa Ginuo, ukon sa ano pa nga hingyo nga gihapon makabulig sa isigkatao.
Kon ano man ang desisyon ni Gen. Torre, ang masiling lang naton amo nga: Saludo kita sa mga maayo mo nga nahimuan Gen.Torre kag handom para sa PNP kag sa mga pumuluyo!/PN
