INDI MAPATIHAN sang madamo ang natabo sa Senate Impeachment Court sang nag-“convene” ini sadtong Hunyo 10.
Sa ina nga tion sang Hunyo 10, gintugtan ni Presiding Senator-judge Chiz Escudero ang privilege speech ni Senator-judge Bato dela Rosa, nga nag-“motion” pa nga i-“dismiss” ang Impeachment Complaint batok kay VP Sara Duterte.
Contrary ini sa opinyon ni anay RTC Judge kag Senator Miriam Defensor nga sa Impeachment Court indi tugot ang mag-“motion” katulad sang ginhimo ni Bato kundi ang magpabutyag lang sang “clarification” sa isyu angot sa “proceedings”.
Isa pa, sworn-in na ini si Bato bilang “impeachment judge” nga dapat magdala sang “independent mind” agud matun-an kag mahusgaran sing maayo ang “impeachment case” ni VP Sara halin sa pagbayluhanay sang mga argumento sa tunga sang Prosecution kag Defense.
Pero naghimo gid si Bato sang “judgment” nga “not guilty” si VP Sara paagi sa iya “motion” nga i-“dismiss” ang Impeachment Complaint sang Kamara nga daw Defense Lawyer siya ni VP Sara. Tungod sini, dapat tani nag-“inhibit” na si Bato bilang “senator-judge” kay maathag nga “biased” na ang panghuna-huna sini.
Masadya, nga indi masadya, pa kay ginpabay-an lang ni Escudero si Bato sa iya “out of place” nga “motion” nga mahimo lang sa Plenary Session sang kabug-san sang Senado.
Siling ni Bato nga pinulitika lang ang akusasyon batok kay VP Sara, gali siya man lang ang gapamulitika. Kag kabahin pa siya sang Impeachment Court!
Sa kahadlok seguro, sunu sa iban, sa anay mastermind sang mapintas nga “drug war” nga bisan suspetsado pa lang wala patawad nga ginapamatay. Gintudlo gid gani ini ni anay Presidente Rodrigo Duterte nga amo gid ang mastermind.
Gani nag-“propose” gid ni Senator-judge Alan Peter Cayetano nga ibalik (remand) sa Kamara ang Articles of Impeachment agud ma-review kuno sang Kamara. Nga sandig lang sa akusasyon ni Bato nga may “constitutional infirmity” ini, nga wala ebidensya kundi ang agsik lang sang iya laway nga maaslum!
Indi kita abogado, pero daw indi man ina ang pamaagi sang husgado (court), kundi ang maghimo sing panindugan sandig sa ebidensya kag masaligan nga testigo.
Nahibal-an naton ini tungod sang aton malawig nga experyensya sa mga hitabo sa korte angot sa akon mga libel case (29 tanan) sang nagasulat pa ako sadto sang kolum sa lain nga pamantalaan. Salamat kay na-“dismiss” ini tanan, nga nagpabalik-balik sa akon sa korte sa sulod sang mga apat ka tuig. Hambalon pa, pang-“harass” lang ang mga akusasyon nga ato sa akon.
Nonetheless, ginbotohan gid pabor ining pag-“remand” sang Articles of Impeachment sang 18 ka “senator-judge”. Apang wala malingkang nga ginpamatukan ini sang lima ka prinsipyado nga mga senador. Sanday Koko Pimentel, Riza Hontiveros, Grace Poe, Nancy Binay kag Win Gatchalian.
***
Insulto ining pagpabalik sang Articles of Impeachment sa kinaalam sang Kamara, labi na sa bahin sang House Prosecution Panel of 11 nga nagtuon gid sing maayo agud ma-presentar ang isa ka mabakod nga kaso batok kay VP Sara.
Gani, indi katingalahan nga indi mabaton sang Kamara ining hingyo sang 18 ka mga senador tubtub makuha sini ang sabat sa ila mga pamangkot, labi na gid ang angot sa kon ngaa ginpabalik gid ini sang Senado samtang ang ginbasehan lang sang Senado ang pahayag ni Bato nga wala sing maathag nga rason kag ebidensya.
***
Galungo-lungo gid si Pedro sa natabo nga ini sa pagbukas pa lang sang Impeachment Court. Obvious kuno nga indi man gali makapamensar sing “independent” ang kalabanan nga mga senador, nga ginapamunuan pa sang Senate President. Ti, ano ang maayo?
Tani, siling niya, ang “presiding impeachment judge” sa kaso batok sa Vice President dapat Chief Justice man sang Korte Suprema, kag indi lang ang Senate President.
Well, ang aton 1987 Constitution gasiling nga Chief Justice gid lang ang maka-preside sa Impeachment Court batok sa Presidente, kag wala na sang iban luas sa iya.
Kon inang provision sang Konstitusyon indi lang “literal” kundi “substantive” man, kag wala sing “exception”, wala na sang iban nga interpretasyon dira bisan “obvious” pa nga “politically biased” ang Senate President bilang “presiding impeachment judge”, katulad sang suspetso sang madamo kay Escudero.
Bangod sina, kinahanglan gid matuod nga ma-“amend” inang “constitutional provision” sa impeachment sang mga dalagku nga “government officials” kun diin ang Chief Justice ang maga-preside man sa “impeachment case” sang Bise Presidente bangod “political personality” man siya katulad sang Presidente. Indi bala amo man ina ang ginapunto mo, Pedro?/PN
