MAS MAAYO pa sa mga kabanwahanan tungod ginapasulabi nila ang serbisyo para sa mga pumuluyo. Ginauna nila ang nagaka-angay kag nagakadapat kasubong sang mga kasilyas nga ipahamtang sa ila mga plaza.
Nagtuga sang kontrobersya sang damlag lang ang nag-viral sa social media ang picture nga gin-post sang nakatukib sang higko sang tawo nga ginbilin sa playground sang Jaro Plaza.
Nagakahulugan nga wala sang kasilyas ang Jaro Plaza kag ang naalangan nga maghigko, nga wala nakapugong, didto na lang nagpalipod kag nagpaagwasa.
Tuman ka importante ang mga kasilyas sa public plaza tungod nga tilipunan ini sang mga tawo, sang mga pasahero, sang mga nagalagaw kag nagapaliwa-liwa.
Kon ginakay-o ang plaza, dapat may temporaryo ukon portable toilet nga ipahamtang agud nga may mausar ang mga maalangan sa dalan. Dapat may nagamentinar sang katinlo, may nagagiya sa mga naga-usar kag nagapanugyan nga ipabilin ang katinlo sini.
Indi dapat pagnegosyuhan ukon may bayad, boluntaryo man ukon indi, nga ginahulog sa kahon tungod mabudlay ini i-account kag mangin alagyan sang kurapsyon.
Ginadayaw naton ang mga banwa nga ginapasulabi ang pagtukod sang mga kasilyas sa ila plaza nga matahum, matinlo, kag may nagamentinar nga mga empleyado sang banwa.
Dapat nga sundon ang pagdumala sang mga banwa sang Igbaras, Cabatuan, Calinog, kag iban pa. Ang mga banwa nga wala pa sang kasilyas ang ila mga plaza dapat man nga maghingagaw sa pagpatukod sini.
Kadaku sang kita kag pondo sang mga local government unit. Dapat painan sang pondo ang pagpatindog sang mga kasilyas sa plaza.
Diri sa syudad sang Iloilo, madamo kita sang ginapabugal, madamo sang mga dalagku nga edipisyo, madamo sang mga tawo kag bisita, apang daw nahuya kita sa mga kasilyas nga daw indi mapabugal. Panamion, patinluan, paayuhon, kag dapat makahatag sang dungog sa syudad sang Iloilo.
Sa subong, may portable toilet sa Jaro plaza. Pero kon kinahanglanon ang lain nga serbisyo sang kasilyas, dapat kadto ka sa mga malapit nga mall ukon establisemyento nga may kasilyas para didto magpaawas.
Lantawa ang kabudlay kon magdagon-dagun ka pakadto sa Jaro Cathedral nga kapin 150 metros. Kon mas tawhay nga kasilyas, didto sa mall nga kapin sa 350 metros ang kalayuon.
Kinahanglan mo pa nga mag-agwanta sa pagpadulong sa layo nga lugar para lang maka-usar sang kasilyas. Tun-an mo lang ang magpangabay agud makausar sang ila kasilyas nga para sa ila sumilimba, ukon mga kliyente, ukon mga kustomer.
Indi na kinahanglan nga may paindis-indis sa panami-nami kasilyas antes kita maghulag kag magtukod. Indi naton kinahanglan ang award, sundo lang naton ang aton katungdanan nga magserbisyo kag ihatag ang maayo para sa mga tawo.
Pero kon gusto sang syudad sang Iloilo nga agawon ang korona sang syudad sang Baguio, subong pa lang himakas na.
Liwat nga nakaagom sang pagkilala sa kalibutan ang City of Baguio bilang Botanical Garden and Wright Park Public Toilets sa 2025 ASEAN Tourism Standard Award for Public Toilet. Ikaduha na ini nga pagdaug umpisa tuig 2023.
Naagom nila ang kadalag-an tungod sa kasilyas nga matinlo, eco-design, kag luwas nga usaron. Tuman ka katinlo kag presko gamiton. Ini ang rason kon ngaa gin-endorso sang Department of Tourism ang mga entry sang Baguio matapos ang tuman ka id-is nga ASEAN-standard evaluation.
Kabay pa nga maghatag ini sang inspirasyon sa syudad sang Iloilo nga masami nagahimakas nga makaagom sang award, luyag pirme nga ginalawag kag nagabaton sang sertipikasyon, kag nagapabugal sa iya mga naagom.
Tion na nga magplano ang syudad sang Iloilo kon ano ang manami nga desinsyo nga nagasibu sa kinaiya sang mga Ilonggo. Kon paano ini makaserbe sa kadamuan kag makahatag sang kadungganan sa tanan.
Nakahibalo kita nga luyag lang sang Iloilo City Goverment nga masami dayawon. Tion na ini nga maghimo sang angay kag bagay para sa sina nga kadayawan.
Dapat iplastar sa lugar nga mahapos tultulon sang publiko, dapat may cctv camera sa entrada agud mahibaluan kon sin-o ang nagasulod kag para may matudlo kon sin-o ang nagaguba ukon nagahigko sa kasilyas.
Dapat masanag ang palibot agud wala sang mga landong nga makapalipod. Kahibalo na kita sina kon ano kasutil sang mga Ilonggo.
Dapat bastante sa tubig agud mapabilin ang katinlo. Habon kag tissue paper nga mausar. Nagahigko lang ang kasilyas kon wala sang dakpon ang kamot sang nagapungko kag nagapautwas sa trono.
Imbis nga magbinais sa konseho, dapat may plano ang mga konsehal, ilabi ang mga masami nagapangape sa mga kapehan sa mga plaza, nga dapat padasigon ang pagtukod sang mga kasilyas sa mga plaza sang syudad sang Iloilo.
Nagalaum ang mga Ilonggo nga ila na nga mabatyagan ang serbisyo nga ginapasalig sa ila sang mga yara sa pwesto. (bertladera@gmail.com/PN)
