Ni Cyrus M. Garde
Syudad sang BACOLOD – Lima ang gindala sa ospital matapos makahaklo sang kemikal halin sa nagasungaw nga fire gadget sang isa ka fast-food sa Dalan Lacson diri mga alas-2:20 sang Miyerkoles sang hapon.
Ang lima ginkilala kanday Aunel Bautista nga nag-angkon sang first degree burn, Renante Osorio, Christian Esporas, Michelle Juanillo, kag Remy Joy Noble.
Sunu kay Fire Chief Inspector Bartolome Beliran, Bacolod City Fire Marshall, ang kemikal nagsungaw halin sa kitchen fire suppression system sang fast-food nga ginagamit agud magtapna kon may sunog nga magluntad.
Dugang ni Beliran nga ang potassium-based nga kemikal nga na-angut sa gadget amo ang nahaklo sang mga biktima.
Nahibaluan man sa imbestigasyon nga nag-brownout sadto nga tion kag ginpakamaayo sang lima ka crew nga mag-gwa anay agud magpanyaga. Sang nagsiga na, nagbalik sila sa sulod kag didto na nila nahaklo ang kemikal rason sang ila pagka-lipong.
Nahibaluan nga wala nila ma-off ang gadget sang nag-brownout kag sang magsiga, amo yadto kag nanimaho ang sulod sang fast-food.
Dali-dali sila nga gindala sa Western Visayas Regional Hospital pero nag-gwa man dayon ang apat matapos mabulong.
Nagpabilin naman didto si Bautista agud bulngon pa ang iya paso./H
