MAAYO kag malain nga balita ang gindala sang pagbisita ni Philippine Charity Sweepstakes Office (PCSO) general manager Royina Garma sa syudad sang Iloilo.
Ang maayo amo nga minilyon ka pesos ang iya gindala nga pondo. May gin-turn over sa gobyerno probinsyal kag dakbanwa sang Iloilo.
Nag-turn over man si Garma sang P58.1 million nga one percent share sang Commission on Higher Education (CHED) sa gross income sang PCSO. Ini nga mga pondo malawig na ang malambutan. Malawig na ang madalaganan nga mga proyekto.
Sa iya paghinun-anon sa mga katapo sang media, ginsiling ni Garma nga nagdoble na ang adlawan nga financial assistance nga mahatag sang PCSO Iloilo. Gikan sa P400 million magasaka ini sa P800 million kada adlaw. Makabaton sang maximum nga P40,000 – P50,000 ang nagapangayo sang bulig sa idalum sang Individual Medical Assistance Program (IMAP).
Subong man, gin-ako ni Garma nga manubo pa ini bangud sang una makahatag sila sang maximum nga P80,000 – P100,000 sa pasyente. Apang bangud sang TRAIN Law, nagnubo na ang income sang PCSO. Panawagan ni Garma suportahan ang mga produckto sang PCSO kay ang pagsakdag sini makabig donasyon sa mga programa sang gobyerno.
Ginkumpermar man ni Garma nga sa masunod nga duha ka tuig amat-amat na nga madula ang IMAP bangud sayluhon na ang pondo sa PhilHealth paagi sa Universal Health Law (UHL) sang gobyerno. Ini nga programa nagasakop sang PhilHealth coverage sa tanan nga mga Filipino; 40 percent sang income sang PCSO ginahatag sa UHL.
Ang malain nga balita kay ang mga operators sang STL sa Iloilo daw mawad-an gid sang papay. Suno kay Garma, mentras indi sila makabayad sang P700 million nga utang sa PCSO indi sila makabalik operate.
May P300 million nga utang ang ZFIC, ang operator sang STL sa syudad, samtang may P400 million nga utang ang Red Subay Corp. nga operator naman sa probinsya.
Pahayag ni Garma kun wala lang naghinambog ini nga mga operators, wala tani sila sang problema. Ugaling kay ginpadako pa gid nila ang commitment sa gobyerno. Ang resulta indi nila masarangan gani atras sila.
Plano nga buksan sang PCSO ang Iloilo sa bag-o nga mga STL operators. Banned na ang mga karon nga operators sa pag-intra.
Bilib man kita kay Garma. Maisog maghambal kag prangka./PN
