MGA ARMAS, BALA NAKUMPISKAR SA RAID!

Madamo nga mga hinganiban kag bala ang nakumpiskar sang Regional Intelligence Unit sang PNP sang ila gin-raid ang ginarentahan nga balay ni Eugene Angelo Lacson Gawat sa No. 85 San Carlos, West Avenue, Sta. Clara Subd., Bgry. Banago, Syudad sang Bacolod, Miyerkoles sang gab-i. Lakip sa ila narekober amo ang 16 ka mga AK-47 riffles, 25 ka jungle knives, duha ka malagba nga shotgun, duha ka .45 kalibre nga pusil kag madamo nga mga bala nga ara sa sulod sang Toyota Hi-Ace van. (Laragway ni Archie Rey Alipalo)/H
Madamo nga mga hinganiban kag bala ang nakumpiskar sang Regional Intelligence Unit sang PNP sang ila gin-raid ang ginarentahan nga balay ni Eugene Angelo Lacson Gawat sa No. 85 San Carlos, West Avenue, Sta. Clara Subd., Bgry. Banago, Syudad sang Bacolod, Miyerkoles sang gab-i. Lakip sa ila narekober amo ang 16 ka mga AK-47 riffles, 25 ka jungle knives, duha ka malagba nga shotgun,
duha ka .45 kalibre nga pusil kag madamo nga mga bala nga ara sa sulod sang Toyota Hi-Ace van. (Laragway ni Archie Rey Alipalo)/H

Ni CYRUS M.  GARDE

Syudad sang BACOLOD – Madamo nga mga armas kag bala ang nakumpiskar sang mga katapo sang Regional Intelligence Unit (RIU) sang PNP sa pag-raid nila sa isa ka puloy-an sa Sta. Clara Subdivision, Brgy. Banago diri mga alas-6:30 sang gab-i sang Miyerkoles.

Ginsulod sang RIU ang balay nga gina-arkilahan ni Eugene Angelo Lacson Gawit sa No. 85 San Carlos, West Avenue sa Sta. Clara subdivision kag nakumpiskar ang 16 ka mga AK-47 nga mga riple; 125 ka mga basiyo sang magazine sang amo nga kalibre; mga kahon sang bala; 25 ka mga jungle knife; 26 ka panit nga pouches; kag 25 ka bilog nga cleaning kits sa sulod sang naga-parking nga Toyota Hi-Ace Van nga may plate no. BDW-122.

Sa isa ka salsalon naman nga cabinet kag sa kwarto ni Gawit narekober ang duha ka malagba nga shotgun; isa ka .30 kalibre nga riple; duha ka .45 kalibre sang pusil; kag 60 ka mga bala.

Nahibaluan nga armado ang mga awtoridad sang search warrant nga ginlagdaan ni Regional Trail Court Judge Anita Guanzon-Chua, Branch 51 sang ginsulod nila ang nasambit nga balay nga ginapanag-iyahan ni Benjamin Jalandoni.

Pero wala nila naabtan didto si Gawit, sa baylo ang mga kabulig lang kag isa ka babae nga ginapatihan iloy sini nga si Suzette Lacson ang ara didto.

Ginapahayag nga si Gawat tumandok sang banwa sang Pulupandan, Negros Occidental.

Ang amo nga raid mahimu naman nga may kaangtanan sadtong pagsulod sang CIDG sa puloy-an ni Atty. Magdaleno Peña sa Brgy. Ubay, Pulupandan sang Mayo 2, 2013 kon sa diin madamo man sang mga armas ang nakuha didto.

Samtang, ginsiling naman ni Dr. Cris Sorongon, presidente sang Rotary Club of Bacolod South, nga si Gawit isa ka nurse kag bise president sang ila Rotary Club.

Gindugang sini nga mainabyanon si Gawat kag sports-minded nga tawo rason man nga katapo ini sang gun club.

Gani nga natingala gid si Sorongon sa sini nga natabo kag wala sia nagapati nga himuon ini ni Gawat.

Ang abogada naman ni Gawit nga si Atty. Joy Barbasa nag-abot kag naghambal nga ang mga armas may ara sang lisensya. Apang sang ulihi naghambal pa gid sia nga indi tanan nga armas ginapanag-iyahan sang iya kliyente.

Sa karon, si Gawat pagapasakaan sang kaso nga palubag sang Republic Act 10591 ukon Comprehensive Law on Firearms and Ammunition./H