Ni Cyrus M. Garde
Syudad sang BACOLOD – Patay ang 54-anyos nga lalaki matapos ma-aksidente sa ginamaneho nga motorsiklo pasado alas-otso ang takna sa gab-i sang nagligad nga Domingo sa Gustilo Boulevard, Syudad sang Cadiz, Negros Occidental.
Ginkilala ni Supt. Gerardo Ulanday, hepe sang Cadiz City PNP, ang biktima nga si Hilario Aldava, bulag sa asawa kag pumoluyo sang Crossing Cadiz, Brgy. Daga kag trabahador sang piggery sa Purok Punong Ko, Brgy. Daga, sang nasambit nga syudad.
Nahibaluan nga hubog si Aldava sang ma-aksidente sakay sa iya motorsiklo kon sa diin nag-ese-ese ini kag bumaliskad rason sang pagkalampos sang iya ulo kag mga gasgas sa lawas.
Ginhingangaw sia dala sa Cadiz City Emergency Clinic apang gindeklarar nga patay na antes mag-abot sa amo nga klinika.
Antes ang hitabo, temprano pa sang Domingo nag-inom si Aldava upod ang iya mga abyan bangod nabalita nga nakabaton ini sang kwarta nga balor P41,000 gikan sa iya amo nga si Antonio Ko.
Ginapahayag pa nga nagbakal si Aldava sang baboy nga gin-ihaw kag ila ginsumsoman./H
