NAKAHIBALO ka na kon sin-o ang pinakanagdaug sa tanan nga ginproklamar nga nagdaug?
Indi ini siya ang imo ginboto. Ini siya ang nangin isa sa palaagyan kon paano ka nakapili sang imo ginboto, kon paano ka nahaylo agud sa iya magboto, kon paano ka nagka-ideya kon sin-o ang imo kandidato.
Daku ang naganar sang Meta paagi sa Facebook tungod sa kampanya sang mga kandidato sang nagligad nga eleksyon. Ini ang sigurado nga daug.
Sa kada tukis mo sang imo Facebook account, makita mo sa imo timeline kag sa news feed ang saot kag propaganda sang mga kandidato. Sa diin man sila nagakadto para magkampanya ukon magpamulong-pulong, indi madula ang live coverage sa social media.
Pagkatapos sang event, gilayon nga ginapasulod sa reel agud nga makita pa gid sang iban nga mga tawo nga may social media account.
Indi na mahinago sa tanan nga ang Facebook amo ang pinakaginagamit nga social media platform sa Pilipinas, kutob sang third quarter sang tuig 2024, suno sa saad sang kapin sa 95 percent sang respondents.
Nagasunod diri ang Facebook Messenger nga may kapin sa 93 percent nga mga Filipino nga nagasiling nga gina-usar nila ang messaging app.
Maathag man para sa tanan, diri sa pungsod Pilipinas, nga ang Facebook indi lamang ginakabig nga social media platform kundi isa man ka mayor nga kuluhaan sang mga balita kag platform para sa e-commerce companies nga malab-ot ang ila mga mangin konsumidor. Indi makatilingala kon paano ginadominar sang app ang social media market sa pungsod kag makita ini sa mas nagadamo nga Filipino nga nagagamit sang Facebook.
Madamo ang nagausar sang social media sa Pilipinas tungod nga ang pungsod napahat-pahat sa madamo nga mga isla, kinahanglan ang masami nga pagpakig-angot nga nagaduso sa pagmuad sang numero sang naga-usar sini sa pungsod. Palaagyan man ini sang mga maghimata kon ang ila katapo yara sa luwas sang pungsod ukon didto na nagapuyo.
Ini ang mga rason kon ngaa madamo sang naga-usar sang social media, ilabi na sang Facebook, diri sa Pilipinas.
Suno sa ginhiwat nga survey tuhoy sa digital news sa Pilipinas sa tunga-tunga sang Enero kag Pebrero sang tuig 2024, kapin sa 61 percent sang respondents nagsiling nga naga-usar sila sang Facebook para makahibalo sang balita. Sa bahin sang YouTube, 45 percent ang nagalantaw diri sang balita, kag 26 percent naman sa Facebook Messenger suno sa mga respondent.
Bangud sa sini nga mga datus, diri man nagpokus ang mga kandidato. Nanotaran man siguro sang tanan nga tuhay ang gahod sa radyo kag telebisyon subong kon ikumparar sa mga nagliligad nga eleksyon nga indi pa tuman ka bantog ang social media.
Sadto, kada lisu mo, mabatian sa radyo kag telebisyon ang mga political jingle kag political ads. Sa subong, malaka na lang. Mas nagabaha ang pasayod sa social media. Ang mga pulitiko may kaugalingon nga Facebook page kag may mga diskarte kon paano makaganyat sang followers.
Sa paglipas sang panahon, mas magasanyog ang pag-usar sang social media sa kampanya. Mas maduagon, mas metikuluso, kag mas makagalanyat sa palamatin-an kag panan-awan ang ipasalida sang mga kandidato.
Lauman naton nga mas pagapainan sang mga kandidato sang daku nga bahin sang ila campaign fund ang social media kaysa sa mainstream media.
Suno sa Statista, ang malab-ot sang social network sa ‘Facebook’ segment sang advertising market sa pungsod ang ginalantaw nga padayon nga magasaka sa tunga sang tuig 2025 tubtob 2030 sa kabug-usan nga 10.7 million users (+15.46 percent). Matapos ang siyam ka asud-asod nga tuig nga pagsaka, ang malab-ot sang social network ginabanta nga makadangat sa 79.88 million users kag gani ang bag-o nga peak sa 2030.
Talalupangdon, ang lab-ot sang social network sang ‘Facebook’ segment sang advertising market padayon nga nagasaka sa nakalipas nga mga tinuig.
Yari ang kadamuon sang mga naga-usar sang Facebook advertising sa pungsod umpisa 2021 tubtob 2030 (sa milyunes): 2021 – 48.47; 2022 – 53.53; 2023 – 58.89; 2024 – 64.45; 2025 – 69.20; 2026 – 73.06; 2027 – 75.99; 2028 – 77.91; 2029 – 78.89; kag, 2030 – 79.88.
Maathag nga padayon ang pagdominar sang social media. Padayon ini nga usaron sang mga kandidato sa masunod nga mga piniliay. Padayon ini nga maga-ambit sang bahin sa campaign fund sang mga kandidato.
Lauman man naton nga madahog ang trabaho sang mga content creator, video kag photo editor. Indi man madula sa lista ang mga manugsulat nga amo ang nagaplastar sang dalagan sang istorya.
Mangin mas magahod ang social media sa masunod nga mga higayon, sa panahon sang kampanya, sa pagdumala sang opisina, kag sa pagpakig-angot sa mga nasakupan.
Indi malikawan nga magapadayon ang pagpangibabaw, ang padayon nga pagdaug ni Meta sa tagsa ka tion nga may hiwaton nga eleksyon sa Pilipinas. (bertladera@gmail.com/PN)
