NAHAM-UT ang madamo sa aton mga pumuluyo sa hinali sang paglisu sang pensar ni Presidente Duterte sa pagbakig-debate sa kay anay Supreme Court associate Justice Antonio Carpio.
Sa nahibal-an na sang publiko ginhangkat ni Presidente Duterte sang sining ulihi lang si SC Justice Carpio sa isa ka debate.
Angot ini sa akusasyon sang naulihi nga ginapabay-an lang ni Presidente Duterte ang pang-abuso sang China sa sulod sang aton 200-nautical mile nga Exclusive Economic Zone.
Kon indi ang ila padayon nga pagpangisda diri (nga ginabaligya pa ining mga isda sa aton), samtang nagasiling ang aton Constitution nga sa aton lang “exclusive use” ang aton EEZ, ginapang-agaw pa gani sang China ang pila naton ka isla sa sulod sini.
Sa iya pag-atras sa debate, ginsiling ugaling ni Presidente Duterte nga nalipat gali siya nga indi siya bagay makig-debate sa isa nga manubo ang tindug sa Presidente.
Manubo gali ang iya pagtan-aw sa anay SC Justice Carpio, nga pila ka beses nga nag-acting SC chief justice. Sus a! “Kahalam-ut!” siling gani sang pila nga nasugilanon naton.
Ang matuod seguro amo nga na-realize niya sang ulihi nga ang makaatubang niya sa debate ang isa ka mas mangin-alamon pa sa iya sa kasuguan.
Diri man sa sini nga debate maathagan pa gid ang isyu sang aton claim sa West Philippine Sea batok sa China, upod ang bagay nga pagduso sang aton kinamatarong sa aton EEZ “short of war” paagi sa malinong nga pag-okupar lang sini.
Kon may pakusog gid man nga matabo indi halin sa aton kundi sa China, kon diin gapati kita indi kita pabay-an sang United States tungod sang aton Mutual Defense Treaty. In fact, gapati kita nga indi magpa-abenturar ang China sa pagpakig-encuentro sa United States sa ina nga sitwasyon.
Nadaug na naton ini nga isyu sa Hague Tribunal sadtong 2016 pa. Kag yara man ang United States sa pagpangapin sa aton. Ti, ano pa ang tulod-butong nga position ni President Duterte angot diri? Basi maki-China gid man ugaling si Presidente.
In fact, masakit sa aton mga pumuluyo nga sa isa ka public address ni Presidente Duterte gintawag niya nga “papel” ukon basura lang ang gindaug naton nga kaso sa Hague Tribunal sadtong 2016.
Na-shock ang madamo. “Impeachable crime”, ukon daku nga kasal-anan ini nga makatabug sa kay Presidente Duterte sa iya pwesto. Kag naghalin ina nga panugdaon sa isa ka naka-intiende gid sang kasuguan.
Ano abe sa inyo nga mga myembro sang Kongreso, nga sa kamot ninyo ginahusgaran ang isa ka impeachment case batok sa Presidente?
***
Sunu sa aton mole sa mga mall sa siyudad, may matahum nga areglo sa tunga sang mall kag sang mga magagmay nga mga tindahan agud pareho sila maka-benepisyo.
Sa ini nga areglo, indi na kinahanglan nga manira ang magagmay nga mga tindahan nga naga-arkila diri kag makapadayon man sa pagganar ang mall.
Sa sining hingyo, ginadula anay sining mall ang pagpanukot sang arkila sang mga magagmay nga mga tindahan diri.
Sa bahin sang mall, maga-share lang ini sang 10 ka porsyento sa income sining mga tindahan.
Mapadayon ining areglo tubtub magpuas ang panghalit sang COVID-19.
Daku ini nga bulig matuod sa mga ginatos nga magagmay nga mga tindahan, nga nagaarkila sang indi magkubos sang P10,000 kada bulan diri.
Magamit pa nila ining indi mahatag nga arkila sa mall para sa ipuhunan sa mga produkto nga ginabaligya nila.
Makabulig man ini sa pagpabilin sa trabaho sang pila nila ka empleyado.
Ang makuha nga 10 ka porsyento sa income sining magagmay nga mga tindahan sang mall, on the other hand, magamit man sang mall ini agud itabon sa ila ginabayaran nga buhis kag mga permit sa ila pag-operar, kag ayhan makahatag man sing bisan diutay lang nga kita nga magamit sini sa mga galastuhan sa pag-maintain sang mall.
Indeed, matahum ini nga areglo, nga pwede sundon sang pila ka mga establecimiento para sa mutal benefit sang management kag mga empleyado./PN
