SA PAGHINUNOD na sang tauhanon nga kabuhi sa amat-amat man nga pagpadulong sini sa inangan sang kabuhi nga dayon (next life in the immortal spirit), mas gabaskug man ang panghagad sang mga nagliligad agud balikan ang mga ini para sa mas makahulugan nga pagtamod sa gapahunas na nga kabuhi tauhanon.
Isa sa sining makahulugan nga nagliligad ko amo kon paano nasolbar namon ang amon problema sadto sa tubig halin sa MIWD – kasosyo na ini karon sang MPIW – dira sa Panay News Compound Area.
Nakasaylo na kami sadto, sa hingyo ni asawahon, sa ila puluy-an diri sa PN Compound Area sadtong 1993.
Gin-okupar namon ang kwarto ni asawahon sadtong dalaga pa siya. Amat-amat namon ini na-extend tubtub may kaugalingon na kami nga kusina kag CR nga nadugangan pa sang gamay nga sala kag isa ka kwarto.
Sadto, gatrabaho ako gihapon sa Panay News nga ang editorial compound tupad gid namon. Sa karon, nangin residential home na lang ini sang ginsaylo sang Panay News ang editorial office sini sa Maliao, Pavia.
Gatrabaho ako sadto bilang tagbalita (reporter) kag sang ulihi bilang weekend editor, tubtub ginbaton ko ang tanyag nga mangin editor-in-chief sang isa man ka daily newspaper diri sa siyudad para masuporta sing mas maayo ang akon pamilya nga upod na ang amon duha ka kabataan. Pulos babaye kag mga propesyonal na ini sila sa karon.
Sa pag-retire ko na sa SSS, nga may diutay nga pension agud makabakal sang akon maintenance medicine, ginhingyo ako ni PN publisher Danny Fajardo÷ nga magsulat liwat – sang kolum na sa Ilonggo.
No problem kay nangin editor man ako sadto sang sister publication sa Ilonggo sang una nga English newspaper nga ginsayluhan ko bilang editor-in-chief. Kag karon, yari na ako nga gasulat sang akon kolum nga Hilway nga Panugdaon diri sa Panay News.
***
Natung-an namon diri sang amon gina-istaran sa PN Compound Area kag sang main road sang Q. Abeto St. sa Mandurriao ang sadto na-abandonar na nga Philippine Oil Drilling Company (Podco).
Sa masami, ugaling, ginalakip pa namon nga mga pumuluyo ang ngalan nga Podco sa amon mga address agud mas mahapos matultulan kami diri.
Diri sa Podco nahamtang pa sadto ang daan nga gripo sang MIWD, nga nahamtang man sa tupad sang dalan nga gintukod sang Podco. Mga 200 ka metro ang layo sini halin sa main road kag 200 man ka metro pakadto sa amon gina-istaran, kon diin kinahanglan sang madamo ang mag-antos gid sa pagpanag-ob dira sang tubig sang MIWD.
Ang iban dira may jetmatic pump, ang isa may dug well nga gina-motor ang tubig paibawbaw sa ila ikaduha nga panalgan, kag ang isa pa (Panay News Compound) may dug well man nga may elevated nga water tank.
Apang kami nagapanag-ob gid, kay sa amon jetmatic pump ang nagagwa baho langis nga nabilin pa sang Podco, nga ginpasarhan na namon.
Daku nga problema matuod ini sa amon. Kag namensaron na ako kon ano ang maayo.
***
Natabuan sadto nga co-founder kag una nga presidente ako sang Iloilo City Hall Press Corps sadtong 1993. Nangin kontrobesyal ini tungod sang wala pinilian nga pag-exercise namon sang Press Freedom sa city hall.
Labi na gid sa bahin sang Konseho, lakip si vice mayor, nga kon gina-isyuhan sila, ginabweltahan man kami sang atake sa radyo, lakip ang paggamit sang block time. Ako pa gani ang sentro sang atake nga nagdalahig pa kay asawahon. Isa ka myembro namon ginsaka man sa iya program booth sa ila radio station. Believe you me, pero gin-atake pa gid kami sang pila sa ila sa isa ka pagtinipon-tipon sang councilors’ league sa Cebu City nga nabalahuba gid sa mga radyo didto.
Ugaling wala kami sing nakita nga problema kay sadto Mayor Mansueto Malabor÷. Simple lang ang iya panindugan parti sa Press Freedom nga amon gina-exercise sa city hall. Kon isyuhan mo siya, siling lang niya: “Basta pasabta lang ninyo ako, a!”
Tungod sadtong panindugan ni Mayor Malabor, nangisog ako nga palapitan kag pangayuan siya sang bulig parti sa amon problema sa MIWD.
Wala namalibad si meyor kag gintudlo ako kay Larry Jamora, nga tsirman sang MIWD, nga nagpasikto sa ila Finance Officer kon pwede madesponeran inang amon problema.
Siling ugaling sang naulihi nga basi ma-pierde ang MIWD tungod diutay man lang kami ang naga-istar (mga 10 lang sadto) dira, kag mga PhP200,000 gid kuno ang gastuhon sa pagtakod pa lang sang MIWD lines diri sa amon.
Nakigpuis ako nga masarangan namon matumbasan ang gasto sini, indi lang magsaku ang MIWD, kay sige-sige man ang pag-serbisyo sang MIWD sa amon.
Nakigsugilanon ako kay Danny parti sa sining problema sa MIWD, nga nalipay gid sa akon ginhingyo. Kag nagsiling siya nga mabulig sa pagkumbinsir sa MIWD.
Kag natuman gid man nga maserbisyuhan kami sang MIWD sadtong 1994-1995. Ang linya sang tubig ginpaagi sa daan nga dalan sang Podco, nga sobra 30 anyos na nga ginaagyan sang mga pumuluyo diri.
Para lang anay sa 10 ka balay ang pwersa nga ginhatag sang MIWD. Pagligad lang sang isa ka bulan amat-amat na apply sa MIWD ang amon mga kasilingan.
Tubtub nagdamo na ang mga puluy-an diri sa PN Compound Area kag nadugangan ang pwersa sang pagpatayon sang MIWD water diri sa amon, nga ang tubig pwede na gani makasaka sa second floor.
Panahon na ato sang mabuligon man nga anay Mayor Jerry Treñas. Salamat Mayor Jerry!/PN
