WALA naman makadumdum si Pedro sang akon kaadlawan. Pero salamat, kay wala naman ini nakapanghagad inom. Ina bala ang nagapalingaso gid, nga kon tawgon niya biti-biti, samtang gamantener lang ako sang isa ka botelya nga light beer.
Pero salamat man kay nadumduman niya ang kaadlawan sang aton bansagon nga kasimanwa, ang nagtaliwan na nga RTC Judge kag Senator Miriam Defensor.
Tungod sini, nadumduman man niya ang akon kaadlawan sadtong Hunyo 15, nga kadungan sang kaadlawan ni Miriam. “Tnx! Kit-anay na lang kita sa masunod ko nga kaadlawan!” siling ko na gid lang kay Pedro kag ginkadlawan siya. Nagnguri-nguri lang ang tarso.
***
Sa wala pa nakahibalo parti kay Miriam, natawo siya sadtong Hunyo 15, 1945 sa La Paz, Iloilo City sa mga ginikanan nga sanday Benjamin Defensor, isa ka lokal nga hwes, kag Dempna Palma, isa ka college dean.
Nagtaliwan si Miriam sadtong Setyembre 29, 2016 bangod sang balatian nga stage 4 cancer.
Topnotch siya nga estudyante sa tanan nga ginsudlan niya nga mga buluthuan halin sa elemenarya tubtub sang nagtapos siya sang Political Science kag Law sa UP-Dilliman kag nag-abogada na. Nagpasanyog pa gid ini sang kinaalam sa nagapanguna nga mga unibersidad sa gwa sang pungsod – sa Oxford, Harvard, Cambridge kag The Hague of International Law.
Tungod sining mataas nga mga kinaalam nga naangkon niya nabotohan siya sadtong 2012 bilang isa ka judge sang International Criminal Court. Wala niya ugaling ginbaton ina tungod sa amo nga tion na-diagnose na siya sang early stages of cancer.
Samtang, ginkilala man siya bilang isa sang “100 Most Powerful Women in the World” kag “Lady Dragon of Asia” bilang maisug nga graftbuster.
Nangin law professor, author, kag nag-serve sa tatlo gid ka sanga sang aton gobyerno – bilang RTC judge, Agrarian Reform Secretary kag Immigration Commissioner, kag tatlo ka beses nga nag-senador.
Nagdalagan siya sa pagka-presidente sadtong 1992 kag diutayan lang nagdaug batok kay anay Police Chief Fidel Ramos sa diutay gid lang nga abanse sang naulihi, nga nangin controversial pa.
In fact, madamo pa nga kadungganan ang nabaton ni Miriam halin sa aton gobyerno kag sa iban nga mga katapuanan lakip ang sa luas, nga indi na naton madumduman pa.
Sa iya pagtaliwan, ginkilala pa gani siya sang madamo nga mga pamantalaan bilang “The Best President We Never Had!”
***
May diutay pa nga hitabo nga nadumduman naton angot kay Miriam. Sadtong mga estudyante pa kami sa kolehiyo.
Editor-in-chief sadto si Miriam sang UP Iloilo paper kag ang nagtaliwan nga Iloilo City Councilor German Gonzales presidente naman sang Student Council sang amo man nga unibersidad. Sa lain ako sadto nga kolehiyo nagatuon, ang The Linclon College, kag presidente sang Iloilo College Editors’ Guild.
Bantog sa UP Iloilo ang indi pag-intiendihanay ni Miriam kag ni German tungod sa mga isyu angot sa campus leadership, nga nahibal-an man naton tungod pirme ako nagaduaw sa UP Iloilo kay German angot sa madamo nga mga isyu nga may kaangtanan sa student movement sa panahon nga ato sang amat-amat sanyog na sang student power.
Nabatyagan ko ugaling nga wala naluyagan ni Miriam ang pagkasuod ko kay German, nga ginpakita niya sa indi pag-attend sa mga miting namon nga mga student editors.
Nagligad ang madamo pa nga tinuig nga wala gid ako makahigayon agud magkit-anay kami ni Miriam bisan sa tion sang pagpangampanya niya diri sa Iloilo sadto sa pagka-senador kag tubtub nangin senador na.
Salamat kay sang ulihi nagkit-anay gid man kami. Natabo ato sa isa ka college reunion sang The Lincoln College, kon diin nangin estudyante siya sa elementarya.
Na-assign ako nga mag-introduce kay Miriam bilang inspirational speaker sa sina nga okasyon. Aba, todo dayaw ako sa iya naangkon nga mga kadungganan kag nakapangamusta gid man ako sa iya sa una nga kahigayunan.
***
Mas nangin malapit pa kami ni Miriam sang nag-upod ako sa campaign group niya sang nagdalagan siya sa pagka-presidente batok kay Ramos.
Ginpangunahan ining campaign group ni Gng. RUTH TIROL-JARANTILLA, nga maninay ko sa kasal. Bless her soul! Nagtaliwan si Maninay Ruth sadtong 2024 sa edad nga 87.
Bugal namon ni asawahon nga nangin maninay sa kasal si Maninay Ruth. Isa siya ka topnotch civic leader kag philanthropist sa siyudad sang Iloilo. Kag napadunggan bilang isa sang mga 10 Outstanding Ilonggos of Iloilo City. Nangin Area Director man siya sang Zonta Club Philippines kag nagpanguna pa sa pila pa ka mga katapuanan, lakip na ang pagka-Chairman sang isa ka rescue group sa panahon sang kalamidad diri sa siyudad.
Sadto, Presidente man si Maninay Ruth kag General Manager sang Socorro Pharmaceutical Laboratories sa Quezon City, Socorro Drug Co. nga may sanga sa siyudad sang Iloilo, kag tag-iya man sang Seawind Resort Boracay sa Malay, Aklan.
Happy birthday, Miriam, kag God bless your soul, maninay!/PN
