MAGA-UMPISA ang pagpangalagad sang mga napilian nga mga opisyales sang nagligad nga eleksyon sa pag-abot sang alas 12:01 sang Hunyo 30, 2025.
Mga bag-o nga napilian kag liwat nga napilian sa ila tagsa ka posisyon. Preska nga mandatu ang ila gina-abaga gikan sa mga pumuluyo nga ila ginapangalagaran.
Ang kasingki sang kampanya nagtahaw na kag nabaton na sang kalabanan ang nangin resulta sang Mayo 12 nga eleksyon. Bisan nga may iban sa ila nga daw indi makapati sa naagom nga kalutusan, may nagapahimunong na lang kag ang may inugbato padayon nga magapakigbato.
Tuman ka dasig sang panahon. Malip-ot ang tatlo ka tuig nga panahon sang pagpangalagad sa banwa. Sa nasiling ko na, tatlo ka paskwa kag tatlo ka kwaresma ang magalabay kag liwat naman nga magasingki ang panahon sang kampanya.
Sa sulod sang tatlo ka tuig, kon tutukan sang nagdaug ang iya katungdanan sa pumuluyo, madamo siya sang mabuligan, madamo sang mabatak gikan sa malala nga kahimtangan.
Mabudlay lang kon ang nagapungko sa pwesto mabuyo sa pamulitika kag indi makatrabaho sing husto para sa kaayuhan sang mga pumuluyo.
Indi malikawan nga may mga tawo nga mahingabuton, mangita sang paagi kon paano makasamulak sa trabaho sang nagapungko kag luyag nga tay-ugon sa pulungkuan ang nagapungko sa pwesto.
Lauman na ini sang mga yara sa pwesto tungod kabahin na ini sang mga risgo sa pagserbisyo sa tawo. Indi dapat magbingit ukon madali matublag bangud sa sini nga mga lihok sang nagakontra sa ila.
Sa pihak sang sini nga mga alatubangon, sang mga pagpanghangkat kag mga pagpangharog sang iban nga tawo nga naga-interes sa pwesto, dapat nga magtutok sa pagtuman sa iya katungdanan ang nagdaug sa pwesto.
Dapat nga balikan ang mga pamulong-pulong nga nabungat sadto sa panahon sang kampanya, mga pasalig nga pagahimuon sa tion nga mangibabaw sa eleksyon kag makapungko sa pwesto.
Mahapos ang magpasalig kag magtug-an kon ano ang mga dapat nga himuon agud lamang nga maganyat ang mga botante nga mag-upod sa kawsa sang kandidato. Mahapos maghatag ang solusyon kon yara sa entablado, ilabi na kon gina-eksperyensyahan ini nga kabudlay sang mga nagapamati.
Kon gusto sang nagdaug nga liwat nga sakdagon sang pumuluyo sa masunod nga eleksyon, ang iya pagpungko sa katungdanan amo ang higayon agud nga ipakita ang iya ikasarang sa posisyo nga iya ginauyatan.
Tion ini nga dumdumon ang mga gintuga-an sa pumuluyo nga iya buhaton ang mga bagay nga makahatag sang kaayuhan sa kahimtangan sang iya nasakpan, kag mapasanyog ang pangabuhi sang mga pumuluyo.
Mabug-at ini nga palas-anon. Indi ini masarangan sang isa lang ka tawo bisan pa siya ang may poder sa pwesto. Kinahanglan niya nga magbuylog kag magpabulig sa mga tawo nga may ihibalo sa iya luyag ipatuman nga mga programa kag proyekto.
Bisan ano pa ka nami sang programa kon indi pagbuylugan kag wala sang may magabulig sa pagpatuman, mangin isa lamang ini ka damgo nga wala sang katumanan.
Gani, sa mga magapangalagad umpisa alas 12:01 sang Hunyo 30, 2025, buksan ninyo ang inyo talatapan sa mga may yara sang ikontribwer sa pagpatuman sang inyo mga gintug-an sa pumuluyo. Dapat suguran sang mas temprano agud nga mabatyagan sang tawo ang inyo kasinsero sa pagserbisyo.
Dapat nga mapuslanon ang una nga isa ka gatus ka adlaw ukon masobra sa tatlo k ka bulan nga pagpangalagad agud nga may isugid sa tawo kon nagabuylo na ang natungdan nga talatapan sa pagserbisyo sa iya nasakupan.
Indi mabudlay ang magbantala sa mga nahimuan sa talatapan tungod nga may social media nga mahimo gamiton agud makapaaliton sa pumuluyo. Ang mabudlay lang kon wala sang isugid nga nahimo para sa pumuluyo.
May mga kandidato sadto nga maayo lang sa pamaba, maayo lang sa paghambal, maalam pamatian, puno sang solusyon ang iya paminsaron apang wala sang may nahimo sa una nga 100 ka adlaw sa iya pagpangalagad.
Gani, kaangay ini sang isa ka pahanumdom para sa tanan nga dapat indi mangin malipaton sa mga gintug-an sa pumuluyo. Dapat indi mangin tinikal ang mga pasalig sa panahon sang kampanya.
Namati kag namalakpak sa pamulong-pulong ang pumuluyo sa panahon sang kampanya kag magalantaw kag magapakamalaut kon wala tupa ang ginahimo sa pwesto.
Yara ang tawo nga nagapanilag kag makamutik sa tanan nga hulag sang mga nagapungko sa pwesto, handa nga magpahayag sang pagkadisgusto kon ang mga pasalig wala ginahimo.
Agud nga mahamut-an sang pumuluyo, tumanon ang mga ginpangako. (bertladera@gmail.com/PN)
