NAKASULOD ako sa pagpanerbisyo sa gobyerno matapos mahatagan sang kahigayunan ni Vice Governor Christine “Tingting” Garin. Iya ginbuksan ang ganhaan kabangdanan nga nakasulod ako kag naglawig sang masobra apat ka tuig.
Sadtong Hunyo 2020, sa wala ginalauman nga higayon, nakabaton ako sang tawag nga nagapatpat kon luyag ko nga magtrabaho sa gobyerno.
Nagpaminsar ako sing malawig tungod nga ginpanday ako sang panahon sa pribado nga mga kompanya.
Bilang gradwado sa kurso nga Mass Communications, major in broadcasting, makahalam-ot nga una ako nga nangin empleyado sa isa ka logistic kag warehousing company. Mas dominante ang numero kag imbentaryo sang mga produkto. Tuman ini ka layo sa akon kurso apang gin-trabaho ko tungod nagapati ako nga kinahanglan ko nga may ihibalo sa mga bagay sa palibot, dapat wala sang pili sa kon ano nga trabaho ang magaabot ilabi na nga bag-o lang nakagradwar.
Nakasulod ako sa isa ka radio station sa City Proper kag naglawig lang sang kapin duha ka tuig. Ginsundan sang pagsulod ko sa isa pa ka radio station sa La Paz kag naglawig ako sang masobra 10 ka tuig. Pagkatapos sina, didto naman ako sa radio station sa Jaro sang mas menos tatlo ka tuig.
Ginpanday man sang panahon ang akon pagsulat, una sa Hublas nga Kamatuoran kag subong diri sa Panay News.
Nagmuklat ang akon pang-ino-ino nga bilang katapo sang Fourth Estate dapat mangin tagbantay ako sa mga nagakatabu nga kagarukan sa gobyerno.
Indi ina mahinago tungod nga may panahon nga nangin mabaris sa pagpangapin sa interes sang mga pumuluyo. Masami nga nagapakamalaut sa mga kasaypanan nga ginahimo kag ginakomentaran ang mga nagapasaway nga trabahante sang gobyerno.
Pagsulod ko sa kapitolyo, tuhay ang sitwasyon. Dapat kahibalo magplastar kon diin nga lugar kag kon ano ang angay nga buhaton. Madamo sang mga ginahimo sa pribado nga pagpang-empleyo nga indi pwede sa gobyerno.
Mabudlay nga masawayan kag mamantsahan ang ngalan sang mga tawo nga nagasalig sa akon.
Natun-an ko kon paano magtrabaho kon yara sa talatapan sang gobyerno.
Nagapasalamat ako kay Vice Governor Christine “Tingting” Garin sa higayon nga makatuon ako sa kon paano ang trabaho sa Sangguniang Panlalawigan, sa ila pamaagi sa paghiwat sang sesyon kag committee hearing, sa ila pagdihon sang mga ordinansa kag mga resolusyon.
Isa ka bugal nga mangin pinakauna nga information officer sang Sangguniang Panlalawigan, ilabi na sa panahon sang 13th kag 14th SP, sa idalom sang pagpamuno ni Vice Governor Christine “Tingting” Garin nga amo man ang pinakauna nga babaye nga bise gobernador sa probinsya sang Iloilo kag nakatapos sang iya tatlo ka termino ukon siyam ka tuig.
Mas nangin pamilyar ako sa kaundan sang agenda kag mga ginatalakay sa tagsa ka sesyon. Madamo ako sang nasumalang nga bag-o nga ideya paagi sa mga ginapasar nga mga ordinansa.
Nagalaum ako nga nakabulig ako sa pagpalapnag sang mga impormasyon tuhoy sa mga lihok nga ginahikutar sang mga katapo sang Sangguniang Panlalawigan. Kabay nga nakalab-ot sa mga pumuluyo ang mga kaayuhan nga ginahandom sang Provincial Board sa mga pumuluyo sa bug-os nga probinsya sang Iloilo.
Kabay nga nabatyagan sang mga pumuluyo ang kon paano sila pangapinan sang Provincial Board sa ila mga balakhuon kag para sa kaayuhan sang ila sektor kag sa bug-os nga pumuluyo.
Dugang nga kaalam, dugang nga ihibalo sa kahimtangan sang probinsya sang Iloilo ang akon natun-an samtang yara ako nagapangalagad bilang information officer.
Magapanaog man ako sa Hunyo 30, 2025 kadungan sang pagtakop sang termino ni Vice Governor Christine “Tingting” Garin.
Nagadepende sa masunod nga bise gobernador kon ano ang iya mangin plano kag ipatuman nga mga programa kag aktibidades.
Importante sa tanan nga nahimo ko ang akon katungdanan nga mapalab-ot sa pumuluyo sa bug-os nga probinsya sang Iloilo ang mga impormasyon nga luyag ipadangat sa ila sang mga katapo sang Provincial Board, ang mga lihok nga makabenepisyo sa ila, mga tikang nga makapangapin sa ila kag makasuporta sa ila mga hilikuton kag aktibidades.
Nasaksihan ko ang pinasahi nga liderato ni Vice Governor Christine “Tingting” Garin. Wala sang pagkatublag sa ila trabaho ang ila magkatuhay nga Partido. Wala sang higayon nga wala nadayon ang ila sesyon bangud wala sang quorum. Wala napaslawan ang ila sesyon, pirme sila may quorum, kabangdanan nga madamo sila sang napasar nga ordinansa kag resolusyon.
Sa sini, nagapasalamat ako kay Vice Governor Christine “Tingting” Garin sa kahigayunan nga nangin kabahin ako sang 13th kag 14th Sangguniang Panlalawigan kag nakatrabaho sa de-kalidad kag de-kalibre nga mga public servant. (bertladera@gmail.com/PN)
