USO na gid subong ang mga surveys. Bisan ang national government nagatamod man sa mga surveys bilang ubay sa ila hinimuan kag pagahimuon samtang ara pa sa katungdanan.
Sikat ang Social Weather Stations, Pulse Asia kag Gallup Poll kun national surveys ang hambalan. Sila ang naga-conduct sang mga commissioned kag non-commissioned surveys kada quarter ukon sa ano man nga frequency nga gusto nila makuha. May surveys man nga ginahimo agud pulsohan ang publiko sa mga mainit nga isyu sang panahon.
Diri sa syudad sang Iloilo kilala ang Random Access Consultants, Inc. (RACI) sa mga local surveys ilabi na sa patag sang politika. Pinakaulihi diri amo ang survey sa syudad kag probinsya sang Iloilo.
Sa pagkaalkalde sa syudad abanse si Cong. Jerry TreƱas nga may 62.2 percent samtang 29.5 percent naman para kay Mayor Jose Espinosa. Sa bahin sang probinsya, lampaso man si Cong. Ferj Biron kay Cong. Arthur āTotoā Defensor Jr. sa pagkagobernador sang probinsya.
Diri sa syudad sang Iloilo ngaa tuman ka dako ang abanse ni TreƱas kay Espinosa? Ano bala ang mga interventions nga nagakatabu?
Sa bahin ni TreƱas, ginaalegar nga may impluwensya sya sa election sang Sangguniang Kabataan kag barangay elections tubtob sa federation elections. Ang tanan nga nagdaug ginsiling nga suportado ni TreƱas. Ini amo sanday Leila Luntao sa SK Federation kag Punong Barangay Ma. Irene Ong sa Liga ng mga Barangay.
Ginareklamo man sang kampo ni Espinosa nga ginapunggan ang mga kapitan nga magpalapit sa iya.
Subong padayun man ang pagsulod ni TreƱas sa mga barangay kag pangbubod sang mga proyekto. Halos tanan nga kapitan sang barangay ara sa iya kampo.
Samtang sa bahin ni Mayor Jose Espinosa III ang iya mga interventions amo ang Pag-ulikid program sa mga barangay nga nagadala sang basic social services; madasig nga paghatag sang financial assistance sa mga nabiktima sang kalamidad; social pension sa mga tigulang nga wala nasakop sang programa gikan sa Department of Social Welfare and Development, kag madamo pa.
Ang pamangkot subong, sin-o ang mga nag-commission sang survey? Ano ang katuyuan sang survey?
Bisan pa nga masiling nga scientific ang survey, apang mamusingan ang resulta sini kun ano ang matuod nga katuyuan.
Mabaskog nga mind-conditioning ang survey. Nagatuyo ini nga magtuga sang ginatawag nga ābandwagon effect.ā Ina bala nga kun diin ang madamo, didto ka man kay abi mo amo na gid ang maayo.
Si Mayor Espinosa, sa iya media interviews, nag-question sang resulta sang survey. Siling nya kun ang P350,000 nga gasto sa survey ipakaon sa mga senior citizens mas maayo pa.
Ang importante nga survey, suno pa kay Espinosa, amo ang sa adlaw sang election.
Pero maayo man nga sa mas timpranon nahibaluan ang pulso sang banwa. At least, makaumpisa na ang mga ulihi sa pagpabakod sang ila kampanya. (jpranco1975@gmail.com/PN)
